Grunnhygginn skrifar

Guggú

2012-02-17T20:13:00.002+01:00

Mánudagsmorgun, eitt ósvarað símtal ca. klukkan 11. Systir mín hafði hringt og ég fékk ónotatilfinningu. Ég hringdi tilbaka og fékk þær fréttir að Guggú væri dáin. Uppáhaldsfrænka mín var farin að hitta mömmu mína...saman hönd í hönd inn um himnadyr og skilja okkur eftir hérna niðri til að halda áfram.

Guðrún Hjörleifs eða Guggú var, að öðrum frænkum ólöstuðum, mín uppáhaldsfrænka. Hún var alltaf, og ég meina alltaf tilbúin að spjalla. Ég man eftir ótrúlega mörgum góðum stundum með henni fyrir ofan Sparkaup þar sem Guggú bjó fyrst þegar hún bjó í Keflavík.

Hún var einstakur stuðningur fyrir mig í gegnum ýmsar stundir í mínu lífi, bæði í gegnum súrt og sætt. Það sem var svo gott að hún var snillingur að "teikna upp" núverandi aðstæður og kannski benda á eina til tvær leiðir út úr ákveðnu ástandi. Hún tók ekki ákvarðanir fyrir mig, enda hefði það verið rangt, en hún hjálpaði mér að sjá hvaða leiðir voru færar. Fyrir það verð ég að eilífu þakklátur.
Hlátur er það fyrsta sem mér dettur í hug þegar ég hugsa til Guggú og reyndar alla Eleonórudeildina. Ofsaleg gleði var alltaf þegar ég hitti Guggú og þó kannski það lægi illa á þá var húmorinn alltaf skammt undan.
Śeinustu árin, eðlilega kannski, var lengra á milli heimsókna. Ég hitti Guggú seinast jólin 2008 og þó heimsóknin var stutt þá var hún góð. En síminn var ekki langt undan...

Ragnhildur, Atli og Elonóra hafa misst mikið allt, allt of snemma og mína innilegustu samúðarkveðjur til þeirra. Samúðarkveðjur einnig til Dodda, Magnúsar, Hanný, Eddu og Stínu. Systkinahópur sem er einstakur. Samheldnin frábær og nú hoggið mikið skarð áný í þennan einstaka hóp.

Guggú, takk fyrir frábærar stundir. Þú varst og ert í einu orði frábær!

kveðja,

Arnar Thor

Merkilegt nokk

2011-09-22T18:41:00.002+02:00

Hæ,

Ákvað að setjast niður og slá inn eitthvað. Hef reyndar frá littlu að segja. Sami grautur í sömu skál eins og hann pabbi minn segir.

Heimilislífið gengur sinn vanagang. Hænurnar tvær út í garði verpa eitthvað minna en í upphafi, en í staðinn eru þær ekki eins flóttalegar. Þær halda sér innan lóðamarka, sem var ekki raunin í vor þegar þær algjörlega mistúlkuðu hlutverk sitt og héldu að þær væru farfuglar.
Kanínan, Stampi, unar sér vel. Pínu frekur blessaður, en hefur nú fengið tvo naggrísi með sér í búrið. Sambúðin gengur að mér sýnist bara vel.

Heimilisfólkið hefur það fínt. Skólinn kominn á fullt og vinnan líka.

Ég persónulega hef verið svona doldið "under the weather" með eitthvert magavesen. Vonandi fer það nú að lagast...en því er ekki að neita að þetta er hvimleiður andskoti. Dregur stundum úr manni allan mátt og ekki hef ég nú verið þekktur fyrir að vera máttmikill fyrir. Den tid den sorg.

Kosningar eru nýyfirstaðnar hérna í Danmörku og voru alveg stórskemmtilegar. Kosningaþátttaka er aðdáunarverð...held að hún hafi verið í kringum 87 prósentin og það eru ekki margar þjóðir sem státa sig af því.
Sósíaldemókratar (Samfylking) og Sósíalístísk Folkepartí (Nokkurs konar Vinstri Grænir) töpuðu mönnum en unnu samt. Hinir tveir flokkarnir, til vinstri eða í rauðu blokkinni eins og það er kallað hérna, Radikale venstre (Venstre er jú hægri flokkur hérna í Danmörkinni og þá vandast málin við nafngiftir ef þú ert í raun til vinstri) fengu umtalsvert meira fylgi en venjulega bættu við sig mönnum. Enhedslistinn (einingalistinn í beinni þýðingu og hefur ekkert með byggingar að gera) þrefaldaðist í stærð, fór úr 4 þingmönnum í 12. Anyway, rauða blokkinn vann og stjórnarflokkarnir verða S og SF þrátt fyrir að hafa í raun tapað mönnum. Þeim til stuðnings verða svo hinir tveir rauðu flokkarnir. Helle Thorning leiðir sósíaldemókratana, sem er stærstur í rauðu blokkinni, hún mun væntanlega verða forsætisráðherra og þar með fyrst kvenna að gegna því embætti í Danmörku. Sem sagt sögulegt allt saman. Núnú þar sem við höfum rauða blokk þá hlýtur að vera til blá blokk og hún samanstendur af 4 flokkum: Venstre (já einmitt! stærsti hægriflokkur í Danmörku) Konservativ (íhaldið eða framsókn) Liberale alliance (það sem Venstre var einu sinni, einstaklingsfrelsið í algleymi) og svo Dansk Folkeparti. Síðastnefndi flokkurinn er magnaður því þeir eru leynt og ljóst á móti öllum innflutningi af hverju sem er og þá helst ef það er homo sapiens sapiens.
Kosningabaráttan var reyndar snörp, einungis um 3 vikur. Mikið af umræðuþáttum á öllum ljósvakamiðlum og ég naut mín vel :)

Jæja, ég afsaka þessi pólítísku leiðindi og vonast til að krota fljótlega aftur.

kveðja,

Arnar Thor

Vinn heima í dag.

2011-03-17T08:46:00.002+01:00

Sælt veri fólkið.

Ég biðst forláts á bloggleysinu. Þessi blessaða fésbók dregur úr manni allan bloggkraft, en jæja prófum að henda einhverju inn hérna þar sem ég er nú að vinna heima í dag.

Það er alveg skelfilegur lúxus að geta unnið heima. Ég þarf ekki að fara í jakkafötin, raka mig og fara í sturtu. Ég get strokið hrjúfan vangan, notið svitalyktarinnar og drukkið allt það kaffi sem mig langar til. Ég tek símann þegar þarf, svara tölvupóstum og slæ inn vinnuskýrslur. Rás 2 ómar úr alnets útvarpinu, sem ég vil meina að hafi verið bestu kaup síðustu ára. Afskaplega huggulegt.

Síðastliðinn þriðjudag lágu skilaboð á símsvaranum mínum. Maður að nafni Borgþór vildi ná sambandi við mig. Ég tengdi ekki strax...en fattaði svo að þetta var Borgþór kennari úr Fjölbraut Suðurnesja. Hann var á leið til Odense og datt í hug að kíkja við í kaffi. Hann kom í einn kaffi í gær og það var alveg stórskemmtilegt að hitta Borgþór og rifja upp gamla tíma. Ég áttaði mig á því í gær að þegar hann kenndi mér leit ég á hann sem "eldri" mann. Mann á svona ótilgreindum aldri, svona bara eldri. Hann var 37 ára þegar hann kenndi mér Listir 103 í Fjölbraut 1987...þremur árum yngri en ég er í dag!!! Ég hef verið að bryðja róandi í dag eftir þessa uppgötvun. Ég er orðinn "eldri maður". Mér líður samt alltaf eins og ég sé 17...sambýliskona mín vill kannski færa þann aldur enn neðar.

Árið "so far" hefur verið alveg ágætt. Veðrið hefur þó verið leiðinlegt. Mér er næstum alltaf kalt. Húsið hérna er líka álíka þétt og wikileaks...gustar um allt. Ég er næstum alltaf í ullarsokkum og lopapeysu þegar ég er heima. Anyway, árið so far. Við fórum í smá framkvæmdir í eldhúsinu. Fengum leyfi til að laga það aðeins og tókst að gera það sómasamlegt fyrir afskaplega lítinn pening. Oddur vinur okkar hér í bæ var driffjöðurinn í þessu verkefni. Hann lagaði borðplöturnar, flutti til skápa í innréttingunni og skar út fyrir vaskinum. Núna er ísskápur ekki á miðju eldhúsgólfi og við höfum borð í eldhúsinu. Nú langar mann að hafa eldhúsið hreint og fínt...ekki alveg mest ríkjandi löngun áður. Oddur stóð sig eins og hetja. Hann lét meira að segja ekki hnykk á bakið stöðva sig. Hélt ótrauður áfram. Allt var klárt á tæpri helgi. Ég hjálpaði með því að vera ekki fyrir og vinna sem snattari. Lærði vel á Bauhaus þessa helgi.

Hænur og kanína eru enn á lífi. Hænurnar verpa eins og það sé enginn morgundagur. Alveg magnað. Ég held að við séum með 20 egg í ísskápnum núna og ég á eftir að ná í eggin í dag. Síðan þessar elskur tóku búsetu hérna höfum við keypt einu sinni egg...á 9 til 10 mánuðum...væri fróðlegt að reikna þann sparnað. Reyndar borðum við ekki mikið af eggjum.

Steini mætti á svæðið um síðustu helgi og það var ferlega gaman. Við elduðum andabringur á sunnudaginn og ég mun lifa lengi á þeirri steik. Grunnurinn að sósunni var ca. hálf flaska af púrtvíni :)

Framundan er svo ferð til Gautaborgar þar sem ég fer á námskeið í verkefnastjórnun. Stefni á að kíkja á ættingja í leiðinni ef tími gefst til.

Aftur að kjötkötlunum...þessir tölvupóstar svara sér ekki sjálfir.

Lifið heil.

Arnar Thor

Síðbúið áramótablogg

2011-01-27T21:15:00.001+01:00

síðasta ár var bara alveg ágætt. Fór til Pólands og sá Varsjá. Byrjaði að sprikla í körfubolta aftur og hélt jól. Lifið heil.

Rifja upp.

2010-10-16T10:20:00.004+02:00

Varð fyrir því óláni að fá olnboga í síðuna. Átti glæsilegt upphlaup að körfunni og fékk olnboga frá vélstjóra inn í síðuna. Fjandi vont. Vélstjórinn þó saklaus þar sem framhleypnin var öll mín.
Nú er ég búinn að gráta í viku og missa alla virðingu á heimilinu.

Vildi bara deila þessu með ykkur.

Föstudagskvöld 15.október 2010

2010-10-15T22:37:00.002+02:00

Jæja, enn og aftur byrja ég á þessu. Vikan hefur verið alveg ágæt, nema hvað að ég man eiginlega ekkert eftir þriðjudeginum. Málið er að í vinnunni þarf ég að fylla út í lok vikunnar hvurn fjandann ég hef verið að drolla í vikunni. Allir dagar samviskusamlega skráðir í dagbók og Outlook dagatalið, nema þriðjudagurinn. Ég get bara ómögulega munað hvað ég gerði eftir klukkan 10 þann dag. Keyrði samt 300 km þennan dag. Það náði ég þó að nótera.
Til að gera yfirmanninn svona þolanlega sáttan þá sagðist ég hafa unnið heima ;)

Pizza hér í kvöldmat. Heiða stóð sig með prýði og gerði hrikalega góða pizzu á bökunargrjótinu sem við eigum. Svo er búið að drekka vel úr hvítvínsbeljunni í eldhúsinu og ekki laust við að 32 tommu sjónvarpið sé orðið að 64 tommu tæki.

Einhverra hluta vegna er ég alveg voðalega mikið að hugsa um jólin þessa dagana. Hlakka til að fá allt þetta Jóló í hús. Jólin fyrir mig eru dagarnir fram að aðfangadegi, eftir það er svona eiginlega alveg sama fyrir mig, á meðan ég fæ mat.

Annað sem er vert að minnast á í þessari viku er að ég hitti tvífara Rodney Dangerfield.

kveðja í bili,

Arnar Thor

PS: Ef ég á að blogga meira þá endilega leggið komment.

Smá blogg

2010-06-07T11:27:00.002+02:00

Jæja, kannski maður kroti smá hérna, enda ekki nema ca. hálft ár síðan síðast. Árið hefur gengið bara svona þokkalega. Bíllinn fékk yfirhalningu og kostuðu herlegheitin litlar 14 þúsund danskar. Það var ekki nema 7 þúsund meira en lagt var upp með. Allar bremsur voru í klessu, skipt um tímareim, viftureimsdisk, hjólbarða og hele galleriet smurt líka. Þannig séð þá er þessi upphæð ekki há, en vont að fá þetta í einum skammti.

Búsetan á Munkebjergvej hefur gengið glimrandi. Börnin hafa komið til mín með reglulegu millibili og það hefur verið mjög ljúft. Nú er komin upp sú staða að okkur býðst betra húsnæði nær vinnunni hennar Heiðu og skóla krakkanna. Ef allt gengur eftir áætlun þá verðum við flutt í júlí byrjun. Húsið er hreint út sagt frábært. 2 auka herbergi, garður og kanínubúr. Frekar flott og ekki skaðar að maður sparar 1000 danskar krónur á mánuði í húsaleigu. Garðurinn verður frábær viðbót.

Vinnan er svona alveg ágæt þessa dagana. Áherslubreytingar í gangi sem munu verða til þess að ég vonandi verð meira í ráðgjafahlutverkinu og minna í support. Það er nú það sem ég vil og vonandi skapar þetta reglulegri vinnudag og minni eftirvinnu á kvöldin. Sjáum svo hvað verða vill.

Í næstu viku verð ég svo í Gautaborg í 3 daga á námskeiði og ef þetta verður eitthvað í líkingu við síðasta ár þá getur þetta ekki orðið annað en skemmtilegt. Skemmtilegir kennarar og ekkert "report" helvíti eins og oft hefur verið.

Sumarfríið svo í júlí og svo áður en maður veit af er komið haust...ætli ég kroti ekki eitthvað þá líka.

lifið heil.

Arnar Thor

Viðbót við annál

2010-01-03T13:24:00.001+01:00

Hitti Addý á árinu líka.

kveðja,

Arnar Thor

Gleðileg Jól 2009

2009-12-24T09:47:00.003+01:00

Árið 2009 hefur verið viðburðaríkt. Gargandi krísutíð alls staðar og Íslandið í sárum. En Ísland mun rísa aftur ekki vafi á því. Get nú ekki sagt að krísan hafi hrjáð mig sérstaklega mikið á árinu. Sú krísa sem ég hef verið í fjárhagslega hefur ekkert með heimskrísuna að gera. Ég er bara að vinna mig úr pati síðustu ára. En það lítur vel út. Fertugur verð ég með aukapening hver mánaðarmót og ætti að geta keypt mér húsnæði þegar ég fer á eftirlaun :)

Í byrjun árs flutti lítil stúlka inn til mín með börnin sín tvö...og hún er hér enn. Nú erum við flutt í nýtt húsnæði og meira pláss fyrir alla. Ég er alsæll með sambúðina. Fæ að horfa á fótbolta og sofa út. Hvað meira getur maður beðið um.

Árið í vinnunni hefur verið spennandi. Mikið að gera og kúnst að finna "réttu kúnnana" svo að ársáætlun haldist. Og það tókst bara nokkuð vel. Ég og félagi minn Jesper erum með bestu deildina á norðurlöndum. Allir kátir með það.

Ég hef líklega heimsótt um 300 mismunandi fyrirtæki á árinu af öllum stærðum og gerðum. Ég hef keyrt ca. 45 þúsund kílómetra fyrir vinnuna á þessu ári. Það út af fyrir sig er afrek því að Danmörk er ekki stærsta land í heimi.

Bíllinn minn er reyndar orðinn svolítið lúinn og fékk smá marblett í síðustu viku þegar ég leyfði honum að kynnast vegriði á hraðbrautinni. Lukkulega urðu engin slys á fólki og eina sem laskaðist var stolt ökumannsins, sem var nýbúinn að segja við vinnufélagann að hann væri þaulvanur að keyra í snjó.

Við krakkarnir fórum í skemmtilega ferð til Svíþjóðar í sumar. Keyrðum fyrst til Gautaborgar og dvöldum þar hjá Atla frænda í góðu yfirlæti. Þar hittum við svo Vilborgu og Co og Ragnhildi og co. Svo skemmtilega vildi til að ég hitti líka einn annan ættingja í flugumynd, Kalla Sig hennar Hjördísar föðursystur.

Frá Gautaborg lá leiðin til Stokkhólms, enda örstutt frá og börnin settu ekki smá bíltúr fyrir sig. Þar hittum við Helga Þór vin og klú"pp"félaga og áttum skemmtilega daga þar. Að lokum enduðum við í Malmö og kíktum á Hjörleif frænda, Jenný og bumbubúann. Þar fékk ég whiskýnámskeið "helt gratis" og bankandi höfuð daginn eftir.

Okkur tókst að leggja ca. 2000 km að baki í Svíþjóðarferðinni og geri aðrir betur.

Svo kom haustið og við Heiða ákváðum að 2ja herbergja íbúð væri kannski helst til of lítil. Við fundum þessa fínu íbúð nálægt miðbænum og leigan var ekkert svo há...nú voru líka tvær fyrirvinnur. Okkur líður afskaplega vel hérna og nú þegar ég skrifa þetta er allt skreytt, matarlyktin yfir allt og stutt í að jólin gangi í garð.

Þetta ár hefur ekki verið án fórna. Í desember dó Kalli, fyrrum mágur minn, og það var töluvert áfall. Ég þekkti Kalla mjög vel og átti með honum skemmtilegar stundir. Hann til dæmis bauð mér í fyrstu og einu veiðiferðina. Við stóðum í Þórisvatni 16.júní í snjóbyl og fiskuðum eins og enginn væri morgundagurinn. Virkilega góð ferð.

Kalli var óvenju hugmyndaríkur og ofsalega fær í því að hugsa út fyrir kassann. Hann var með margt í smíðum og ég verð að segja að ein skemmtilegast hugmyndin hans var sósupotturinn, þar sem sósan átti ekki að geta brunnið við.

Ég kveð góðan dreng og votta fjölskyldu hans mína dýpstu samúð.

Ég lýt björtum augum á næsta ár þar sem Ísland mun taka handboltann með stæl og England vinnur HM í Suður Afríku. Annað fer ég ekki fram á.

Ég óska öllum nær og fjær gleðilegra jóla og farsæls komandi árs.

Lifið heil.

Arnar Thor

Allt sem þú hefur viljað vita um kynlífið...en ekki þorað að spyrja um.

2009-06-08T22:45:00.003+02:00

Hæ,

Nú get ég ekki annað en skrifað um mjög svo skemmtilega (og kannski óviðeigandi í dag) bók sem var skrifuð af lækninum David Reuben 1969 og kom út á Ísland 1972 í þýðingu Páls Heiðars Jónssonar. Guðsteinn Þengilsson læknir las hana svo yfir og geri ég ráð fyrir að fyrst að bókin yfirhöfuð var gefin út að nefndur læknir hafi verið nokkuð sáttur.

Bókin heitir á frummálinu Everything you always wanted to know about sex but were afraid to ask.

Höfundur fer vítt og breitt yfir efnið og verður að segjast eins og er að textinn er óborganlegur...leyfi ég mér að gefa dæmi:

Um vændi:

...þegar vændiskonan getur ekki séð sér farborða sem "símastúlka" lengur, færist hún skör niður á við í vændiskvenna þjóðfélagsstiganum og byrjar venjulega að vinna í hóruhúsi...

Hvernig líta þessi hóruhús út?
Sé húsið í lítilli landbúnaðarborg í Bandaríkjum Norður-Ameríku, lítur það út eitthvað á þessa leið. Hrörlegt fimmtán herbergja hús stendur við enda aðalgötunnar. Því er fremur vel við haldið og stingur ekki í stúf við önnur hús í nágrenninu að ytra útliti - er jafnvel smekklegra. Miðaldra kona tekur við frakka og hatti viðskiptamannsins og vísa honum því næst inn í rúmgóða setustofu. Glymskrattinn er í gangi og hægt er að fá sér í staupinu. Þrjár eða fjórar stúlkur sitja þar á baðfötum.

Um samkynhneigð...þar sem höfundur veltir ýmsu fyrir sér.

hann vitnar í rannsókn þar sem karlmönnum var gefið estrógen...gagnkynhneigðir virtust jú finna fyrir minnkandi kynhvöt...grípum niður í textann þar sem hann talar um samkynhneigða, sem fengu sömu meðferð...

...Þeir misstu einnig allan áhuga á kynlífinu. Kynfæri þeirra hættu alveg að starfa. Þeir hættu líka að leita eftir félögum. Brjóst sumra þeirra stækkuðu, líkamshárin hurfu - og þeir voru hæstánægðir.

Samlíf samkynhneigðra ber á borð...

...Þeir þurfa vissulega á meiri hugvitsemi að halda á í kynlífssviðinu en vejuleg hjón, þar sem kynfærunum eru vitaskuld takmörk sett...felst yfirleitt í sameiginlegri sjálfsfróun. Hún er fljótleg, auðveld og hagkvæm, þar sem ekki er þörf á neinum sérstökum útbúnaði. Piltarnir hátta sig bara, fara upp í rúm og fitla við limi hvor annars unz komið er að ... Venjulega nægja þrjár til fimm mínútur til að ljúka þessu af.

Dæmin er mun fleiri...og í raun hefði maður átt að rita allan textann hérna á bloggið...ef þið eigið möguleika á að komast yfir þessa bók þá er það vel þess virði...ótrúleg skrif... Það sem veldur mér áhyggjum er ekki það að viðkomandi skrifaði bókina heldur það að hún var yfirhöfuð þýdd á íslensku. og ekki lengra síðan.

Nota bene...í staðinn fyrir orðið samkynhneigð, sem kannski var ekki mikið notað á þessum tíma þá hefur þýðandi valið orðið "kynvillingur" og það kannski segir eitthvað um tíðarandann.

Alveg Bit

2009-04-12T19:16:00.003+02:00

Hæ,

Þar sem það er nú stutt síðan að ég bloggaði þá ákvað ég að hamra járnið á meðan það er heitt og blogga smá í dag.
Páskadagur var mjög ljúfur satt að segja, las smá í Kongungsbók Arnaldar Indriða, át páskaegg og blundaði doldið...svo um hádegisbil var mjólkurfræðingurinn búinn að leggja á borð þennan fína brunch og að þeim loknum var farið í hjólatúr með mjólkurtæknifræðingnum og heiðingjunum tveim. Túrinn var mjög góður. Fórum niður í bæ þar sem ég skakklappaðist í 7/11 og keypti kaffi og meira óhollt og sátum við og gláptum á heiðingjana leika sér. Að leik loknum var svo aftur farið í nefnda búð og bjór keyptur og heiðingjarnir fengu færi til að leika sér meira á meðan fullorðnir bleyttu vel upp í lifrinni og spjölluðu um daginn og veginn. Hugmyndin var að skella sér út að borða hjá einhverjum sem hafði dregið stysta stráið og neyddur til að vinna í dag. Ekki vildi betur til en að Benjamín misskildi þyngdarlögmálið og komast nær H tveir O en ætlunin var. Því var brunað heim með blaut börn og pizza var sett á matseðil í stað "útaðborða". Lukkaðist sú pizza mjög vel enda kúrdi sem hana eldaði og kærði sig kollóttan um að frelsarinn hafi ákveðið nákvæmlega á þessum degi að ranka við sér eftir trévistina.

Þannig að dagurinn var "massagóður", nema hvað að ég virðist hafa nælt mér í eins og 500 bit á rass og læri. Ég lít út eins og fílamaðurinn að aftan og hef sagt upp nælonsokkabuxnaauglýsingasamningnum sem ég var með í hendi.

Gleðilega páska trúaðir og trúleysingjar og heiðnir.

kveðja,

Arnar Thor

Vaknaður!!!

2009-02-17T07:12:00.001+01:00

Vaknaði í dag hálftíma fyrr en venjulega. Vaknandi mönnum er best að lifa.

Lifið heil og áfram Keflavík.

ATS

Hræætusúpa

2009-02-12T19:43:00.002+01:00

Eldaði þessa fínu súpu með hræætum í kvöld. Bætti fyrir frekar dapra eldamennsku í vikunni og sambýlisfólkið sættist við mig á ný.

Annars fátt að gerast. Búinn að keyra ansi mikið í þessari viku og nú er brátt helgarfrí og ég hlakka bara frekar mikið til.

Næsta laugardag er svo BlorraÞót hjá íslendingafélaginu hér í bæ og ég hlakka til að dífa tönnum í hrútspunga, hákarla og fleira. Brennivínið er ekki langt undan heldur. Gott að hafa tilhlökkun í lagi.

Bíllinn gengur ennþá, fjöldi handfanga er ennþá 3.

kveðja,

Arnar Thor

AULI!!!

2009-02-09T22:05:00.002+01:00

Ég er algjör auli. Í morgun ákvað ég upp á mitt einsdæmi að mæta til vinnu. Bílhurðir voru vel frosnar í morgun. Ég sló læsingu frá með þessum fína lykli sem fylgdi bílnum mínum. Þessi central læsing er svo sniðug að ef maður opnar ekki bílinn eftir einhverjar sekúndur þá læsist bíllinn aftur. Ég bara komst ekki inn í bílinn af því að hurðirnar voru frosnar...í öllum hamaganginum tók ég ekki eftir því að bíllinn var aftur læstur. Ég reyndi að tosa duglega í bílhurðina bílstjóramegin og það verður að segjast að hurðin var óvenju föst. Þarna kom að Bud Spencer mómentinu mínu og ég hreinlega reif handfangið af bílhurðinni og bíllinn enn jafn lokaður og áður...ég stóð þarna í örvæntingu...en eitthvað sagði mér að prófa fjarstýringuna á ný og viti menn bíllinn var læstur...ég fór hinu megin og þar gat ég opnað án vandræða.
Niðurstaðan var því sú að ég stóð eins og hálfviti með handfangið af bílstjórahurðinni og leið eins og aula. Núna verð ég að fara inn í bílinn hinu megin til að komast inn í bílinn.

Svona var byrjunin á þessum mánudegi og stutt í föstudaginn 13.

Lifið heil.

Þriðji mánudagur í Janúar er versti dagur ársins.

2009-01-19T19:10:00.002+01:00

Hæ,

Las það í dag að þriðji mánudagur í Janúar er talinn versti dagur ársins...það er svo skemmtilegt að þessa frétt man ég að hafa lesið fyrir ári síðan. Kann að vera rétt...en dagurinn í dag leið nú bara hjá furðuvel. Vinnan var "easy fix" eins og vinnufélagi minn segir...reyndar þegar hann segir þetta þá fyrst fer ég að hafa áhyggjur.

Annars ósköp fátt að frétta...sami grautur í sömu skál. Örlítið fleiri á heimilinu þessa dagana. Tveir gríslíngar og Mjólkurfræðingur með meirapróf.

Á morgun verður nútíma messías settur í valdamesta embætti í heimi og ekki laust við að hysterían sé að fara með allt og alla. Blessaður Obama þarf að standa undir væntingum sem eru meiri en þegar íslenska landsliðið í handbolta mætir á stórmót. Vona að hann fái smá séns blessaður.

Jæja, læt þetta duga í bili.

ble ble

Arnar Thor

bloggfærsla

2009-01-14T16:48:00.000+01:00

Færði þetta blogg í dag...núna er það lengra til vinstri á skjánum hjá þér...

kveðja,

ATS

Jól og Áramót

2009-01-04T00:56:00.002+01:00

Jæja, ég var hvattur til að blogga smá í dag.

Mætti á klakann á Þorlák eftir frekar næs flugferð frá Danmörku. Pabbi sótti mig út á flugvöll og trillaði mig í bæinn og bauð mér í skötu. Skatan var hreinasta snilld.
Á aðfangadag var Ellen svo með svín í boði til að halda upp á blessað Jesú barnið. Skemmtilegt að við skulum nú snæða í sumum tilfellum svín til að halda upp á að gyðingsbarn hafi komið í heiminn. Steikin var ferlega góð með flottri glasseríngu.
Svo opnuðum við pakka og áttum ljúfar stundir.

Daginn eftir var svo haldið í hangikjöt til Unnar, dóttur Erlu. Ketið var gott. Annan dag jóla lá svo leiðin til Hjölla bróður og þar var dekkað á borð með hangikj0ti, reyktu svíni og massa góðu lambalæri. Gott kvöld þar.

27. bauð svo pabbi í kalkún og þar var líklega einn stærsti kalkúnn sem ég hef séð. Það dró fyrir sólu þegar hann skröltist út úr ofninum. Erla fór á fætur á undan hringjara Hafnarfjarðarkirkju og klappaði Kalla Kalkún allan daginn. Niðurstaðan var lungamjúkur og safaríkur matur.

28. hittist svo matarklúppurinn góði. Og ó my god hvað andabringurnar voru góðar. Sósan var algjört æði. Raggi og Munda, takk fyrir hrikalega góðan mat og enn og aftur biðst ég afsökunar á því að hafa drukkið ótæpilega af koníakinu. En jú ég var í fríi daginn eftir.

Næstu daga á eftir var ljúft. Ellen systir bauð mér aftur í mat á milli jóla og nýárs.

Stebbi bróðir og Halldóra buðu mér og krökkunum í mat og drykk á gamlársdag. Áttum alveg ferlega fínt kvöld og nótt. Maturinn var tær snilld. Hægsteikt lamb, humar og svo ís á eftir. Að auki voru snakkbirgðir Reykjanesbæjar kláraðar ásamt salsa.

Hjölli bróðir mætti með einn pakka af dýnamíti handa okkur og áttum við í mestu vandræðum með að sprengja þetta allt. Alexander og Dísa lögðu sitt af mörkum og samt var eitthvað eftir. Þau þrumuðu því í átt til gervitungla daginn eftir.

Á nýársdag fékk ég svo tækifæri til að elda. Ég fékk humar og gæs í hendur og fékk að leika mér í eldhúsinu hjá Pabba. Maturinn var nú bara alveg ágætur þó ég segi sjálfur frá. Siggi Hall veitti mér innblástur í gæsinni.

Í gær bauð Steini mér svo í mat, billiard og slatta af rauðvíni. Halli nágranni Steina bauð í billiard á Ölver og það var nú bara ansi gaman. Steini var sjálfum sér verstur og vann að ég held bara einn ramma, kannski 2. Stefnan er sett á að senda Steina á námskeið í viljandi bakspuna.

Í dag fékk ég svo tækifæri til að versla í Sautján og það var nú gaman. Í kvöldmat fékk ég ofsalega góðan silung sem Erla töfraði fram. Fyrr í dag komu belgískar vöfflur á mig í boði Ellenar.

Eins og þið sjáið þá hefur þessi ferð snúist nokkuð mikið um mat. Krakkarnir voru hjá mér hluta af ferðinni og áttum við frábærar stundir saman.

Það verður að bæta við að ég mætti í bumbubolta með gömlum og góðum keflvíkingum. Ég kom sjálfum mér á óvart að halda út æfinguna og meira að segja náði að setja einn flottann í vinkilinn.

Á morgun fer ég út og mæti á svæðið í lok dags.

Þá tel ég mig hafa lokið jóla og áramótaskýrslunni.

kveðja,

Arnar Thor

Skandall í DK

2008-12-04T09:30:00.001+01:00

Hæ,

Stutt til jóla og líklega verða jólin hjá Stein Bagger eitthvað öðruvísi en í fyrra. Þessi ötuli viðskiptajöfur hefur stýrt fyrirtæki sem heitir IT Faktory við góðan orðstýr síðan 2003 þegar fyrirtækið var við það að verða gjaldþrota. Í síðasta mánuði fékk fyrirtækið verðlaun fyrir afrek sín. Danske Bank lagði nýlega ca 350 milljónir danskar í batteríið og Sydbank gerði samning um kaup á hugbúnaði frá IT Faktory upp á 25 milljónir danskar.

Stein var svo í Dubai og sagði við konu sína þar að hann ætlaði aðeins að skreppa frá. Síðan hefur ekkert frést til hans. Konan kom sér heim og veit ekki meir.

Nú hafa runnið einar 30 grímur á fólk í viðskiptaheiminum og kemur í ljós að Stein hefur amk platað ca 500 milljónir danskar frá ýmsum aðilum og allt sem hann seldi var bara heitt loft eins og daninn segir. Síðast sem heyrðist af Stein var að hann væri líklega á Bahamas.
IT faktory, gulleggið í dönskum viðskiptaheimi er farið á hausinn og lögreglan komin í málið.
Stjórn IT faktory virðist ekki kannast við neitt og enginn virðist hafa spurt út í hvernig þessi hugbúnaður sem Stein var að selja liti út, enginn, já enginn hafði hugmynd um hvað hann í raun var að selja þessum háu herrum í viðskiptaheiminum.

Ansi fróðlegt mál og ótrúlegt hversu langt Stein náði að plata alla í kringum sig og nú á hverjum degi kemur ýmislegt í ljós og danskur viðskiptaheimur hálfskammast sín að hafa veitt IT faktory nefnd verðlaun, sem eðlilega voru kölluð tilbaka.

Við höfum oft gagnrýnt regluverkið heima og eftirlit þar, en það var nú einmitt svona regluverk sem klikkaði hér. Einungis einn fréttamaður spurði út í hluti sem virtust ekki passa allir aðrir hoppuðu á skrúðgönguna og dásömuðu fyrirtækið og það ótrúlega afrek að snúa því úr gjaldþrotabúi í fyrirtæki með næstum tveggja milljarða danskra króna hugbúnaðarrisa.

Stein mun sem sagt að halda jólin erlendis með ca. 500 milljónir danskar í farteskinu. Hann ætti að eiga fyrir eins og einni önd og jafnvel meðlæti.

bið að heilsa,

Arnar Thor

A perfect day.

2008-11-23T00:11:00.000+01:00

Hæ,

átti ljómandi dag með krökkunum. Föndur, góður matur, tiltölulega lítið um systkinaátök og gott kaffi...já hreint út sagt fullkominn dagur...meira bið ég ekki um.

kveðja,

Arnar Thor

Bara 40 dagar til jóla

2008-11-15T11:33:00.000+01:00

Já bara fjörtíu dagar til jóla...svona fer nú eftir því hvernig er talið...en sem sagt mjög stutt til jóla frá jarðsögulegu sjónarmiði. Ég er að komast í jólaskap mitt í kreppu...hlakka til að fá krakkana næstu helgi og ætla að láta þau gera jólagjafir handa öllum úr mjólkurfernum, plastpokum og þurrkuðum graskersfræjum...ekki alveg viss hvað kemur út úr þessu, en það er jú hugurinn.

Að öðru leyti þá líður mér bara nokkuð vel í dag...kviðslitsdæmið grær vel og ég væli ekki eins mikið. Reyndar má ég ekki ennþá hnerra, hósta eða hlæja þá rífur vel í ...svo að ég reyni að láta vera að horfa á gamanefni, sleikja kvefað fólk eða pipra...hmm jú ég pipra aðeins.

Laugardagur í dag...stefnan sett á að gera nákvæmlega ekki neitt...glápa á einn leik og svo ætla ég að elda eitthvað græðgislega gott...

Ég bið að heilsa í bili,

A

aftur að froskinum hluti 2.

2008-11-10T23:46:00.000+01:00

Froskurinn var eins og þið munið pínu hissa á þessum blessaða stól. Hann ákvað upp á sitt eindæmi að rölta í átt til þorpsins með stólinn og kannski gæti hann fengið lausn á þessu. Þið spyrjið ykkur kannski: "Hvernig gat froski dottið svona í hug...er þetta ekki bara froskur?" Og satt að segja hugsaði froskurinn um þetta líka, en samt innst inni var þetta bara eðlilegt að hans mati.

Á sama tíma í höllinni í þorpinu var stúlka að vakna. Hún var með höfuðverk og soldið ringluð. Hún leit í kringum sig eins og hún væri að upplifa herbergið í fyrsta sinn. Á gólfinu var stóll á hliðinni. Stúlkan reis úr rekkju og fann ægilega til. Hún var með kórónu á höfðinu sem reif svona vel í hárið þegar hún festist í himnasænginni við rúmið. Þegar þessari glímu var lokið vatt stelpan sér að stólnum og reisti hann við. Stóllinn stóð örstutta stund, en féll svo á hliðina, til hægri. "Þetta er undarlegt!" sagði stúlkan og leiddi ekki lengur hugan að því hvar hún var og af hverju hún var með kórónu á höfðinu. Stúlkan tók stólinn og ákvað að finna lausn á þessu.

Froskurinn var kominn í þorpið með stólinn. Fólkið í þorpinu furðaði sig á að sjá frosk og ekki síður þegar það sá að blessaður froskurinn dröslaði stól með sér. Mesta furðu vakti þó að froskurinn gæti yfir höfuð dregið stólinn, en það gat hann.

framhald síðar.

Aumingja ég

2008-11-05T16:38:00.000+01:00

Hæ,

Ég ligg hérna og hef það ágætt...með rúmlega 10 cm skurð á mallanum...
Ég fór í aðgerð síðasta mánudag og tja alveg ótrúlegt hvað þetta gekk hratt...undirbúinn, svæfður, skorinn, vakinn og keyrt heim á innan við 4 tímum...það kalla ég nú gott.

Heima hjá Addý og Helga fékk ég alveg afbragðs þjónustu. Ég hér með þakka ykkur þúsundfalt...næst þegar ég þarf í uppskurð þá mæti ég til ykkar :) :) :)

Ég kom svo heim í gærkvöldi og satt að segja þá er þetta dæmi bara ansi vont...þökk sé verkjatöflum þá er þetta þolanlegra og satt að segja þá er ég skárri með hverjum tíma sem líður. Ég mun þó ekki gefa kost á mér í komandi landsleiki.

Síðustu daga hef ég séð ansi mikið flöktefni á sjónvarpsskjánum...í dag til dæmis sá ég prýðismynd með Danny Aiello sem heitir Dinner Rush.
Svo hef ég lesið eina skemmtilega bók sem heitir Hjarta Voltaires. Mæli með henni...ég ætla svo að lesa eitthvað meira í kvöld...kannski maður haldi áfram með bók Marinu Lewycka Tveir Húsvagnar amk byrjar bókin vel. Marina Lewycka skrifaði söguna "Stutt ággrip af sögu traktorsins á Úkraínsku" Og sú bók er alveg frábær. Ég las hana reyndar á ensku svo ég get ekki tjáð mig um íslensku þýðinguna, en venjulega eru nú bækur í íslenskri þýðingu ágætlega gerðar.

Í kvöld er svo fótbolti og kvalirnar linast og linast og ég finn að ég er klár í flest fljótlega.

Þakka þeim sem lásu.

kveðja,

Arnar Thor

Froskur með bilaðan stól...framhaldssaga.

2008-11-01T21:36:00.000+01:00

Himininn var blár. Ekki ský á lofti og sólin leit niður, enda skyggni ágætt. Hún sá frosk.

Froskurinn vaknaði og hugsaði með sér [já froskar hugsa]. "Ferlega er ég þreyttur" hugsaði hann og svo leit hann til hliða og sá stól liggjandi á hliðinni. Stóllinn var nú svo sem ekkert merkilegur. Svona melamín húðað dæmi úr Rúmfatalagernum, en samt var Froskurinn tengdur honum einhvern veginn. Jæja, Froskurinn hugsaði með sér "Mikið væri nú gott að setjast á stólinn" svo að hann gerði sig líklegan til að setjast. Hann reisti sig upp á afturlappirnar, því það er nú doldið sem froskar eiga til að gera. Svo reisti hann stólinn við og viti menn, um leið og hann settist féll stóllinn ásamt froski niður á hliðina í átt til vinstri. Froskurinn reyndi hvað hann gat, en blessaður stóllinn datt alltaf til vinstri, og þá skipti engu hversu mikið af laufblöðum froskurinn góði setti undir til að halda stólnum stöðugum. Það var eins og engin nátturulögmál virkuðu á blessaðan stólinn.

Framhald síðar...

2008-11-01T21:31:00.000+01:00

Fínn rómantískur texti sem ég hef fallið fyrir upp á síðkastið:

Going back to the corner where I first saw you,
Gonna camp in my sleeping bag I'm not gonna move,
Got some words on cardboard got your picture in my hand,
Saying if you see this girl can you tell her where I am,
Some try to hand me money they don't understand,
I'm not...broke I'm just a broken hearted man,
I know it makes no sense, but what else can I do,
how can I move on when I'm still in love with you...

Cos if one day you wake up and find that you're missing me, And your heart starts to wonder where on this earth I can be, Thinking maybe you'll come back here to the place that we'd meet, And you'd see me waiting for you on the corner of the street.

Og svo framvegis...fínn texti hjá þeim írsku.

Annars hef ég það fínt..

kveðja,

A

Laugardagur til Legu

2008-11-01T14:35:00.000+01:00

úff maður, kona og barn...svaf til klukkan hálf 12 í dag og fór fyrst á fætur klukkan 13 já þrettáááán!!!

Núna, eftir matarleit (nennti ekki í búð í gær), sturtu og munnskol, er ég kominn til meðvitundar. Hræðilegt að spandera deginum svona í bólinu.

En að öðru...fer í aðgerð á mánudagsmorgun og fæ svo leyfi til að dveljast yfir nótt á Bláberjaveginum í góðu yfirlæti eggjaduftsmeistarans og talmeinadrottningar (þá á ég við að hún viti mikið um talmein, en þjáist ekki mér vitanlega).

Ég set stefnuna á það í dag að leggja mig ekki neitt og halda mig sem lengst frá láréttri stöðu.

Lifið heil.

Arnar Thor Svefnpurka eða SvefnBúrka...hmmm

ISMAR

2008-10-22T11:44:00.002+02:00

SÓSÍALISMI
Þú átt 2 kýr. Þú gefur nágranna þínum aðra þeirra.

KOMMÚNISMI
Þú átt 2 kýr. Ríkið tekur þær báðar og gefur þér mjólk.

FASISMI
Þú átt 2 kýr. Ríkið tekur þær báðar og selur þér mjólk.

NASISMI
Þú átt 2 kýr. Ríkið tekur þær báðar...og skýtur þig svo.

SKRIFRÆÐI
Þú átt 2 kýr. Ríkið tekur þær báðar, skýtur aðra þeirra, mjólkar hina og hellir svo allri mjólkinni.

HEFÐBUNDINN KAPITALISMI
Þú átt 2 kýr.Þú selur aðra þeirra og kaupir naut. Þú stofnar kúabú og hagnast vel. Þú hagnast vel, selur kúabúið og sest í helgan stein

SÚRREALISMI
Þú átt 2 gíraffa. Ríkið krefst þess að þú farir í harmonikkunám.

BANDARÍSKA FYRIRTÆKI
Þú átt 2 kýr. Þú selur aðra þeirra og þvingar hina til að gefa af sér mjólk á við fjórar kýr. Þú ræður svo sérfræðing til að komast að því hvers vegna hún datt niður dauð.

ÁHÆTTUFJÁRFESTINGAR

- Íslendingar
Þú átt 2 kýr.Þú selur 3 þeirra til fyrirtækis á opnum markaði með veði í gervifyrirtæki mágs þíns, gengur svo frá yfirtöku með vísan í skráningu á markaði þannig að þú færð allar 4 kýrnar tilbaka og skattaívilnanir vegna einnar til viðbótar. Afurðarétturinn af kúnum 6 er færður yfir á fyrirtæki í Karíbahafinu, en leynilegur meirihlutaeigandi þess selur þér aftur réttinn að öllum 7 kúnum. Samkvæmt ársskýrslu á fyrirtækið nú 8 kýr, meðeigendarétti að einni til viðbótar. Þú selur eina kú til þess að þóknast ónefndum stjórnmálamanni og átt þá níu kýr. Rétturinn að nautinu er seldur almenningi í hlutafjárútboði.

FRANSKT FYRIRTÆKI
Þú átt 2 kýr. Þú ferð í verkfall, skipuleggur mótmæli og tefur umferð...vegna þess að þúvilt eiga þrjár kýr.

JAPANSKT FYRIRTÆKI
Þú átt 2 kýr.Þú endurhannar þær þannig að þær verða tíu sinnum minni, en framleiða tuttugu sinnum meiri mjólk. Þú markaðssetur svo nýja teiknimyndahetju,„Kúmann“, sem nær miklum vinsældum um allan heim.

ÞÝSKT FYRIRTÆKIÞú átt 2 kýr.Þú endurhannar þær þannig að þær lifa í 100 ár, éta einu sinni í mánuði og mjólka sig sjálfar.

ÍTALSKT FYRIRTÆKI
Þú átt 2 kýr. Þú veist ekki hvar þær eru niðurkomnar. Þú ákveður að fá þér að borða.

RÚSSNESKT FYRIRTÆKI
Þú átt 2 kýr.Þú telur þær og kemst að því að þú átt 5 kýr.Þú telur þær aftur og kemst að því að þú átt 42 kýr.Þú telur þær enn og aftur og kemst að því að þú átt 2 kýr.Þú hættir að telja og opnar aðra vodkaflösku.

SVISSNESKT FYRIRTÆKI
Þú átt 5000 kýr. Engin þeirra tilheyrir þér í raun.Þú rukkar eigendurna fyrir geymsluna.

KÍNVERSKT FYRIRTÆKI
Þú átt 2 kýr.Þú ræður 300 manns til að mjólka þær. Þú segir atvinnuleysi í lágmarki og blómstrandi landbúnað. Þú handtekur fréttmanninn sem sagði frá stöðunni eins og hún er í raun og veru.

INDVERSKT FYRIRTÆKI
Þú átt tvær kýr.Þú tilbiður þær.

BRESKT FYRIRTÆKI
Þú átt tvær kýr.Báðar eru með gin-og klaufaveiki

ÁSTRALSKT FYRIRTÆKI
Þú átt 2 kýr.Bissnessinn gengur vel.Þú lokar skrifstofunni og færð þér nokkra kalda til að halda upp á það.

NÝ-SJÁLENSKT FYRIRTÆKI
Þú átt tvær kýr.Sú til vinstri er asskoti löguleg.

ÍRASKT FYRIRTÆKI
Allir virðast eiga fjölda kúa.Þú segir öllum að þú eigir enga.Enginn trúir þér svo þeir sprengja þig í tætlur og ráðast inn í landið.Þú átt enn engar kýr, en þú býrð þó amk í lýðræðisríki núna...

SKEMMTILEGT 'ik?

Banka, Kreppa, banka, kreppa

2008-10-18T20:09:00.000+02:00

Sá einfaldan en mjög skemmtilegan brandar um daginn og hann skýrir fyrirsögnina.
Annars fátt að frétta. Maður situr límdur við íslensku miðlana á netinu til að fylgjast með mestu fjárkröggum Íslendinga síðan við kynntumst þeim afbragðs rétti maðkskotið hveiti á tímum einokunar...hmmm einokun?

Anyway, súrt að sjá alla í pati þarna heima. Ég verð að viðurkenna að ég er afskaplega feginn að vera réttu megin við Atlantshafið. Ég var til dæmis mjög nálægt því að flytja heim í vor...í dag hefði það verið afar slæmur leikur.

Krakkarnir eru hjá mér um helgina og bara ljúft. Við erum búin að spila og baka í allan dag, enda ekki mikið út að sækja þegar rigningin bylur á gluggum og andlegu þakskeggi.

Ég er sem sagt enn á lífi og stefni á að halda þeirri stöðu eitthvað áfram...lifið heil.

Arnar Thor

Ég var Klukkaður í kvöld

2008-09-24T23:07:00.000+02:00

Kaffisopa, despó og Despó félagi minn hún Heiða, sem brátt flytur yfir á Sjálandið var svo indæl að klukka mig í kvöld. Nú var ég að rembast við að vinna svo að þetta var gleðilegt klukk og helli ég mér bara í efnið:

4 störf sem ég hef unnið um ævina:

bæjarvinnan (fékk 33,39 krónur á tímann), malbik, mælingamaður og svo síðast en ekki síst glorified tech supporter í Friskvinnslunni.

4 kvikmyndir sem ég held upp á (litast doldið af recent glápi):

Sódóma Reykjavík, "Þvag, slátur og aðrar sorgir" (Ris og fall sláturfélag suðurlands), Shrek 4 og svo síðast en ekki síst "Engjaþykknið" (frásaga konu sem fæðist með mjólkuróþol).

4 Staðir sem ég hef búið á:

Kebbblaík, Wurmlingen, Odense og Reykjavík.

4 sjónvarpsþættir sem mér líkar : Despó (já já), BlackAdder, Seinfeld og síðast en ekki síst Þingsjá þættirnir.

4 síður sem ég skoða daglega fyrir utan blogg : mbl, visir, jobindex og svo síðast en ekki síst soccernet.com

4 matarkyns uppáhöld: Humar, andabringur, Jesú matur og síðast en ekki síst eitthvað dýr bakað í ofni á grænmetisbeði.

4 bækur sem ég les oft: Hitchhikers Guide to the Galaxy, Sálmabókin, Davíðsálmarnir og síðast en ekki síst Árbók Hjartaverndar.

4 staðir ég vildi helst vera á núna: Þórsmörk, Reykjavík, körfuboltavelli eða kannski í Róm.

4 manneskjur sem ég vil klukka : Helgi, Ásrún, Steini&Guðrún og svo tja það veit ég ekki...einhver fjórði.

JÆja lifið heil og Heiða takk fyrir klukkið.

kveðja,

A

Fúkkalyf, spælt egg og frygðarlyf

2008-09-10T22:38:00.000+02:00

Hahahahaha fékk ykkur til að lesa.

Anyway, það er nákvæmlega ekkert að frétta....vinnan heldur áfram á minni mjög svo brothættu dönsku þar sem miskilningur liggur á hverju strái. Danirnir í vinnunni eru enn að vinna í að fatta það sem ég vil meina að sé fyndið. Þannig er það nú með snillingana að þeir þurfa helst að falla frá eða í dá til að verða metnir að verðleikum.

Annars er það að frétta að ég fer í rannsókn á morgun út af kviðslitinu og væntanlega verður skorið svo að ég sé ekki alltaf með matinn "utan á mér". Kviðslitið er þó ekki mikið og því eru þetta svona frekar smáréttir sem er meltir að hluta í ytra umfrymi.

Danir eru að spila fótbolta akkúrat núna og gaman að segja frá því að annar þulurinn er enginn annar en Jan Mölby gamli Liverpool sekkurinn frá því fyrir hvað 15 árum síðan. Hann hefur alveg haldið meðalþyngd sinni og vel það. Held að hann sé alveg við 0,1 tonnið.

jæja ses.

Arnar Thor

Silfurtúnglið

2008-08-24T22:35:00.000+02:00

Glæsilegt hjá okkar mönnum. Mættu raunar ofjörlum sínum í dag, en fjandakornið Silfur á Ól. Algjör snilld.

Danir eru enn að væla. Horfði á endursýningu á leiknum í dag og þar vildu þulirnir meina að Ísland hafi hreinlega verið heppið með núverandi fyrirkomulag sem hafi valdið því að þeir fengu "léttari" andstæðinga...Ef Evrópumeistarar og heimsmeistarar ásamt upprennandi Pólverjum og svo Spánverjar eru "léttir" andstæðingar þá kvíði ég ekki framtíðinni.

Nei annars eru Danir þó almennt glaðir fyrir Íslands hönd en vilja þó meina ennþá að Danska landsliðið sé eitt af fjórum bestu í heimi...bara miskilningur að þeim gekk ekki betur.

Jæja, nú er ÓL búið. Hef sjaldan glápt eins mikið á ÓL eins og nú...fékk mikla gleði af að horfa á greinar eins og bogfimi, Suður Kóreu menn kunna eitthvað þar, samhæft sund, dýfingar, ljósritun án atrennu og fleiri skemmtilegar greinar. Ríðingar voru skemmtilegar og unnu danir brons þar...skildi þó aldrei almennilega út á hvað það sport var en virtist eitthvað snúast um að sitja hest undir tónlist og hneigja sig.

Samhæft sund var skemmtilegt. Tveir útvarpsspjátrungar hér í Danmörku, hinir svokölluðu Svörtu Skátar báðu um að lýsa einni íþróttagrein og héldu væntanlega forráðamenn DR að samhæft sund væri skaðlaust...annað kom á daginn. Þeir bakkabræður lýstu þessu á snilldarhátt. Alveg ótrúlega fyndið allt saman. Rússnesku sundkonurnur mynduðu til dæmis "Georgískan turn" Og "þarna mynda stúlkurnar lesbíuhring". Held að þeim verði ekki hleypt aftur inn í beinar íþróttalýsingar í bráð.

Vinnuvika framundan...mikið að gera og útlit fyrir að svo verði næstu vikurnar...það er bara hið besta mál.

Börnin voru hjá mér örstutt um helgina og koma svo aftur næstu helgi. Alveg ferlega indælt.

Bið að heilsa í bili...og já enn og aftur Ísland til hamingju með Silfrið...enda miklu betra verð á silfri en gulli í dag. Passar líka betur við Forsetastellið...held ég.

Arnar Thor

A jing and a jang

2008-08-16T22:20:00.000+02:00

Hæ,

Afburðaslakandi skemmtun í dag að horfa á Ísland ná jöfnu gegn Dönum. Danir voru meira en lítið súrir, en svo sljákaði nú í þeim og þeir viðurkenndu það að kannski hefði andstæðingurinn nú bara spilað ágætlega. Guðjón Valur Sigurðsson sagði "fuck off" við þjálfara dana og svo féllust allir í faðma á eftir þegar geðshræring var komin á normal snúning.
Nú er bara að vinna Egyptana og tryggja okkur amk annað sætið og mæta aðeins skárri andstæðingum en Frökkum.

Að öðru leyti hefur þetta verið slök helgi. Hef ekki gert mikið, en þó var alveg brjálað að gera í vinnunni í gær og það var satt að segja áhugavert. Eitt símtalið var alla leið frá Hong Kong og þar fékk ég mann í eyrað sem hjó sig í gegnum enska tungu eins og enginn annar. Ég vona að ég hafi skilið hann rétt.

Danir eru uppteknir af því þessa dagana að gráta yfir því að hafa ekki unnið nóg af olympískum málmum þessa vikuna. Menntamálaráðherrann kom í beina útsendingu hundfúll..."við erum búnir að borga undir rass... á þessu fólki og það bara vinnur ekki neitt" já já... ansi skemmtilegt allt saman. Gott að hafa metnað engin spurning, en tja þetta eru nú manneskjur eftir allt saman.

Framundan er svo bara slökun á morgun og kannski maður setji í eina þvottavél og geri það kannski 2svar sinnum. Fái mér snarl og svo ætla ég að hreyfa mig smá...hef ekki gert mikið af því síðustu mánuði.

kveðja í bili og áfram Ísland.

Arnar Thor

Sunnudagur til sælu

2008-08-10T20:11:00.000+02:00

Hæ,

Þessi dagur hefur verið með eindæmum rólegur. Í gær fékk ég mér humarsúpu og svo grillaðan humar. Demantsdrottningin lagði til eldhús og hvítvín og ég lagði til humar sem Pabbi var svo elskulegur að leggja í töskuna mína þegar ég fór frá íslensku efnahagslægðinni.
Súpan var indæl. Mallaði skeljarnar í eina 4 tíma og úff þetta er bara "verdens bedste mad" Svo voru nokkrir halar lagðir í smjör og grillaðir. Massa gott.

Í dag hef ég horft á olympíuleikana í "lýðveldinu" Kína. Mjög gaman allt saman. Okkar menn stóðu sig vel gegn rússanum. Danir á hinn bóginn ljónheppnir að ná stigi á móti Pýramídarbúum.
Danskir fjölmiðlar bara skilja þetta ekki...að sækja gullið átti bara að vera formsatriði. Jú spila einhverja leiki, en málminn var alveg eins hægt að senda beint á danska handboltasambandið.
Reyndar er nóg eftir, en satt að segja þá byrjar þetta nú ekki vel. Vonandi náum við Íslendingar að stríða þeim eitthvað.
Skemmtilegt að Danir gera þetta líka eins og við Íslendingar þegar við erum óhóflega bjartsýn fyrir stórmót eða Evróvisjón. Ótrúlega oft margt líkt á með okkur og dönum.

Á morgun byrjar svo ný vinnuvika og tja leggst bara þokkalega í mig. Nóg að gera og þá líður tíminn hraðar.

Þakka fjölmörg "comment" og bið að heilsa í bili,

Arnar Thor sjónvarpsglápari og lífskúnstner.

Snilldarmatur á demnatsveginum

2008-08-03T19:45:00.001+02:00

Hæ,

Búinn í sturtu...ótrúlega gott...var aðeins lengur af því að ég fór að hugsa um Debbie does Dallas myndina.

Var í mat á demantsveginum. Bauð mér í mat, eins og næstum alltaf. Húsfreyjan sá sig nauðbeygða að fara í Brugsen og kaupa á grillið, enda Keflavíkurprinsinn að koma ásamt föruneyti. Sem þó neytti ekki mikils. Ein pylsa dugði í littla manninn á meðan restin snæddi snigla í rotverum, aspas og nautasteik par excellance. Shit þetta var gott maður. Rauðvín flæðir nú um æðar mér og vonandi mun kaffisopinn sem er að kólna við blogggerðina lina þjáningarnar.

Góður dagur maður. Fór með Matthías Pál, já hann heitir það, í Naturama. Þar er fjöldi dýra sem hafa gefið upp alla súrefnisnotkun. Skemmtilegt safn. Pilturinn "vann" sér inn gullverðlaun í ólympíuleikum þar á bæ. Hjálpaði smá að gráta í pabba til að fá góðmálminn á brjóstkassann. En piltur er glaður og þá er pabbi glaður.

Ég bið að heilsa í bili og skila kveðju á Íslandið. Munið að þegar þið berjist við timburmenn á morgun þá er ég búinn að skila 8 tíma vinnudegi...andsk...

kveðja,

Arnar Thor

Verslunarmannahelgi í DK

2008-08-02T09:36:00.000+02:00

Hæ,

Gaman að sjá að heimsóknir og athugasemdir hafa farið fram úr björtustu vonum. Held að það hafi náð heilum 2 í síðasta mánuði. Sökum þess hversu margir þetta hafa verið þá sendi ég kveðju hér á alla. Ekki tími til að leita alla uppi og skila persónulegri kveðju.

Annars er það að frétta að ég hef gengið með utanlegsfóstur í nokkra daga. Þetta hefur valdið því að tölurnar á vigtinni eru hærri en venjulega. Stefnt er að því að minnka fóstrið og þá kannski get ég séð hverrar trúar ég er næst þegar ég stend í sturtunni. Veldur mér miklum áhyggjum enda veit ég ekki hvort ég eigi að grípa í Nýja eða Gamla testamentið til að róa hugann í þessari kreppu.

Peningamálin eru þau sömu, það er að segja ég fæ meint laun en sé lítið af þeim. Vonandi fer nú einhver hluti þeirra í að styrkja félagsbústaði bankamanna, enda ekki vanþörf á.

Dísa og Alexander eru ennþá heima á Íslandi og Sólrún fór síðasta fimmtudag ásamt Anders til að ná í krílin. Matthías er hjá mér núna og verður fram á þriðjudagskvöld.

Matthías er mjög kurteis strákur. Hann vakti mig í morgun og sagði "einhver þarf að fara í sturtu" Hann benti ekki á neinn, en gaf þá viðkomandi tækifæri til að taka þetta til sín. Þetta finnst mér mikill þroski hjá 5 ára barni. Minnir mig á það mig vantar hreinar nærbuxur.

Af dönum er það að frétta að þeir eru að drukkna í verðbólgu. Sparnaður hefur rýrnað og danir eru víst eitthvað farnir að minnka við sig lúxusinn. Þeir þyrftu nú að kynnast verðtryggingu, þá myndu þeir virkilega fara að gráta.

Áður en ég skelli mér í sturtu þá vil ég óska ykkur 2 sem lesið góðrar verslunarmanna(r)helgi og vonandi rignir ekki mikið á ykkur tjaldbúa.

Farinn í sturtu.

Lifið heil.

Arnar Thor

Viðskiptahugmynd

2008-07-18T15:39:00.001+02:00

Vínglasapúsluspil.

kveðja,

Arnar Thor

Stutt stopp

2008-07-06T21:05:00.000+02:00

Hæ,

Enn á lífi. Vikan búin að vera ljúf. Bústaður, humar, heitir pottar, sundlaugar, stökkbretti, kaffitársespressó og góðir vinir og vandamenn.

Núna er ég að fara að fá grillmat og á eftir fæ ég tækifæri til að sjá Kebbbbbblaaaaííííík spila fótbolta á móti fimleikafélaginu.

Lifið heil,

Arnar Thor

LENT!!!

2008-07-01T10:45:00.000+02:00

Við erum komin til Íslands og bara nokkuð kát með þetta. Krakkarnir höfðu vakað frá klukkan hálf eitt miðað við íslenskan tíma. Þau sofnuðu um 9 leytið í gær og það verður að segjast eins og er að þau stóðu sig mjög vel. Alveg ótrúlegt því þau voru ósofin. Átök voru í lágmarki.

Afi Stefán sótti okkur út á flugvöll. Við vorum heillengi í fríhöfninni út af einni rauðvínsflösku. Þrjósk kassadaman vildi frekar fara í gegnum allan rauðvínslistann í gagnagrunninum heldur en að rölta að hillunni og kíkja á verðmiðann. Ég keypti toll...súkkulaði og fleira.

Eftir glæsilegar móttökur hjá Ömmu Erlu, þar sem við fengum heimabakað brauð, heimagerða sultu og fleira. Seinna í gær fórum við svo til Ömmu Rúnu og Afa Didda þar sem kökufjall mætti okkur og var virkilega fínt að hitta þau á ný.

Í dag er stefnan sett á sundlaug, pulsu (pylsu) með öllu og tónleika með Páli Símonar.

Sjáumst síðar...kveðjur frá Alexander, Dísu, Matthíasi og Mér.

Ísland 30 júní til 14. júlí

2008-06-29T10:09:00.000+02:00

Jæja, loks kom að því. Kem til Íslands á morgun...þarf bara að fara á fætur klukkan 3 í nótt til að taka lestina til Köben. Verður gaman fyrir mig og börn.

Hlakka helling til og þeir sem vilja ná í mig eða börnin í síma vinsamlegast hringið í 659 9063

kveðja í bili,

Arnar Thor

Föstudagurinn 6.

2008-06-06T23:55:00.000+02:00

Hæ,

Jamm, undur og stórmerki...eða wonder and big signs...2 blogg á stuttum tíma. Dagurinn í dag hefur verið alveg einstaklega ljúfur og þægilegur. Vinnan var í þægilegu lágmarki og á köflum var hún bara ekkert að trufla einkalífið. Verkfallið heldur áfram og ofurskilningsríkur yfirmaður minn hefur sýnt enn meiri skilning. Ég vinn bara heima og tek símann og svara tölvupósti. Hef þó með góðri aðstoð frá Demantveginum fengið að skjótast í smá fyrirtækjaheimsóknir í verkfallinu.
Matthías er nú farið að lengja eftir að fá að lemja einhverja aðra en systkini og 3ja ára gutta á Demantsveginum. Sá 3ja ára hefur þó náð að hamra aðeins tilbaka svo að það er nokkuð góður viðskiptajöfnuður.

Ég trillaði í búð í dag til að versla afmælisgjöf handa Dísu. Við Sólrún gefum henni í sameiningu forláta síma með smá símaglingri. Held að skvísan verði kát með það. Svo fékk hún bók um gleðigjafann Fíusól frá ömmu Erlu og afa Stefáni. Ég leyfði henni að opna þann pakka núna í kvöld. Ég ætla nú að stelast til að lesa hana. Alveg stórskemmtilegar bækur. Höfundur bókanna er einmitt stórskemmtileg. Ég aðstoðaði hana einu sinni við að koma tölvunni hennar í lag og það var stutt í hlátur á þeim bæ.

Jæja, annars er ég bara að sleikja sólina þessa dagana á milli þess sem ég þykist vera að vinna. Matthías hefur fengið að fljóta með og staðið sig með prýði. Stundum gleymir hann sér aðeins og fer að athuga þolmörk lifandi og dauðra hluta, en allt fer þó vel að lokum og engin veruleg slys orðið.

Á morgun á sem sagt skvísan afmæli og býður bekknum í veislu sem verður haldin heima hjá Sólrúnu þar sem plássið er takmarkað hjá mér og svo er Sólrún margfalt betri en ég að leggja á borð.

Ég bið að heilsa í bili,

Góðar stundir.

Arnar Thor

Laugardagsbloggið

2008-06-01T00:22:00.000+02:00

Hæ,

Já kannski kominn tími á smá bloggedí blogg. Ég hef verið afskapleg þurr á manninn þessa dagana og öflugustu rakakrem hafa ekki dugað. Börnin mín hafa fundið vel fyrir því að pabbi er ekkert sérlega kátur. Það sem pirrar karlinn er verkfall leikskólakennara og peningaleysi. Bæði svo sem auðleysanlegt með samningum og nælonsokkabuxum. En já pirringur hefur verið nokkuð mikill.

En í dag svona um miðbik batnaði undirrituðum og held bara hreinlega að mér líði bara ágætlega. Sósuslettur, ló og leti undirritaðs hefur bara engin áhrif. Mér er slétt sama og bara ekkert pirraður. Hvað veldur þessum straumhvörfum kunnið þið að spyrja? Jú, ég fór í sund með börnin. Hér i bæ HC Andréssonar er fyrirbæri sem kallast "friluftsbad" eða á íslensku "útisundlaug" Þarna er hin myndarlegasta 25 metra laug með stökkpalli fyrir hæfilega geðveika upp í snarbrjálaða. Barnalaugar, handlaugar og guð má vita hvað. Ég undra mig á því að hafa búið hér í 4 ár og aldrei farið. Þarna fórum við í vatnsrennibraut og busluðum í vatni hitað upp af sólinni einni saman. Ekkert of heitt sko, en þetta vandist fljótt.
Á meðan ég lá svo á grasinu og naut sólarinnar þá bara leið úr mér allur pirringur. Þá vitið þið það.

Á morgun er stefnan sett á suður Fjón með Demantsgenginu og finna sér eitthvað afdrep í náttúrunni til að leika, grilla fyllta þarma og sóla sig.

Ég kveð í bili og þakka þeim sem lásu.

Arnar Thor

Updeit

2008-05-31T10:26:00.000+02:00

Hæ,

Ég er ennþá á lífi.

kveðja,

Arnar Thor

Englarnir voru með Alexander.

2008-05-12T14:47:00.000+02:00

Hæ,

Alexander var alveg einstaklega heppinn í gær. Hann var að hjóla frá sjoppunni í gær með poka fullan af góðgæti. Hann var á leið yfir töluvert fjölfarna umferðagötu og varð fyrir bíl. Hann kastaðist líklega upp á húddið og á framrúðuna og þaðan til hliðar við bílinn. Hann slapp með skrámur og marbletti. Hreinlega ótrúlegt að hann skildi ekki slasast meira. Hjálmurinn hans er brotinn á tveimur stöðum og sannast enn og aftur hversu mikilvægur hjálmurinn er.
Alexander greyjið hringdi í mig og var ansi mikið í sjokki, en stóð sig samt rosa vel og var í upphafi meira um að ég væri ekki að hafa of miklar áhyggjur af sér áður en hann lýsti fyrir mér hvað gerðist. Ég kom svo um leið og ég gat og Addý skutlaði mér. Þetta var bara rétt hjá þar sem við vorum í heimsókn hjá Heiðu.
Ökumaðurinn hafði hringt á lögregluna og sjúkrabíll kom líka. Þegar þeir heyrðu hversu mikið högg þetta hefur verið þá var Alexander til öryggis settur í hálskraga og á börur. Svo fór ég með sjúkrabílnum upp á sjúkrahús þar sem hann var skoðaður frá toppi til táar. Enn og aftur er það ótrúlegt að hann hafi ekki brotið neitt, eða fengið önnur og verri meiðsl en þessar rispur.
Ég sagði líka við hann að "englarnir hefðu verið með honum í dag".

Ég hringdi í Sólrúnu frá Sjúkrabílnum og hún kom strax upp á neyðarmóttöku.

Alexander var látinn vera yfir nótt og ég fékk að sofa þar líka á meðan Dísa og Matthías fengu að gista hjá Heiðu.

Nú liggur Alexander hérna í rúminu mínu inn í stofu og er að jafna sig. Hann er afskaplega glaður yfir því að hafa verið með hjálminn því að hann hefur líklega bjargað honum í gær.

Ég verð að viðurkenna það að maður er nú bara í hálfgerðu sjokki yfir þessu og bara ótrúlega þakklátur fyrir að fór ekki verr.

kveðja í bili,

Arnar Thor

37 and still going strong

2008-04-15T21:47:00.000+02:00

Jæja, þar kom að því að ég bloggaði á ný. Átti alveg indælis mælisdag og þakka allar kveðjurnar á Facebook, msn og með bréfdúfum, sem brögðuðust alveg ágætlega.

Vinnan heldur áfram og vinnuleitin líka. Ég fór í viðtal um daginn hjá NNIT, en starfið sem var í boði var ekki nógu heillandi og í raun skref aftur á bak ef ég hefði tekið djobbið. Reyndar voru þeir sammála mér og töldu mig of hæfan. En eins og Blackadder sagði "all is not lost" og þeir ætla að skoða hvað þeir hafa. Ég fæ að vita bráðlega.

Á morgun ætla danskir að fara í verkfall. Hérna eru aðallega atvinnuuppalendur sem fara í verkfall, en líka atvinnuplásturberar og nálaverkendur. Atvinnuuppalendur munu gefa yngstu börnum færi á að njóta starfskraftanna, en Matthías Páll er fæddur vitlausu megin við árið 2005 og er því sendur heim. Þetta þýðir að ég muni taka stuttan vinnudag á morgun, ég fékk pössun fram á hádegi. Við munum skipta þessu verkfalli eitthvað á milli okkar ég og Sólrún þannig að sem minnstur skaði hljóti af.

Jæja, lengra verður bloggið ekki í dag...ég ætla ekki að valda ykkur vonbrigðum með því að lofa að blogga meira á næstunni. Ég hreinlega hef ekki svo mikið að "blogga um" þessa dagana.

Lifið heil og munið að sannleikurinn liggur í botninum á koníaksflöskunni...drekkið og þér munið finna.

kveðja,

Arnar Thor

Páskar 2008

2008-03-23T16:58:00.000+01:00

Hæ,

Gleðilega páska. Ég verð að segja það að þessir páskar hafa verið alveg indælir. Slöööööööökun út í gegn. Ég hef ekki slakað svona á í mörg ár. Slökunin byrjaði á miðvikudag og stendur enn yfir. Andabringur voru á boðstólum fyrsta kvöldið með aðstoð Fröken Demantsvej, svo fylgdu á eftir röndótt pasta með kjúlla á fimmtudeginum.
Á föstudaginn langa kíkti ég svo í heimsókn til Dorte og hjálpaði henni að hengja upp hillur, gardínustöng og fleira. Eftir þann glaðning fórum við í langan göngutúr eftir Odense á. Við gengum í hátt í 3 tíma meðfram ánni í fallegu veðri og þá er líkamsrækt síðustu mánaða talin upp. Ég fékk þessar fínu blöðrur á hælinn.

Í gær var svo grillpönnusteiktur lax á borðum með óhóflegu magni af hvítlauk og kannski í enn meira óhófi hvítvínslögg...kannski frekar heilt vatn og dró úr mér mikinn ef ekki allan mátt.

Í dag hef ég svo borðað lakkrís páskaegg frá Góu ásamt því að lesa nýjustu bók Arnaldar Indriða.
Fínasta lesning og langt síðan ég hef lesið heila bók á einum degi.

Ég fæ krílin til mín á eftir og stefni á að skella þeim í kvikmyndahús á morgun. Þannig eru og voru páskarnir hjá mér.

Ég las líka aðra bók eftir Arnald, Vetrarborgina, sem var mjög fín.

Áhugaverðar myndir sem ég sá um helgina:

Brokeback Mountain (Betri og öðruvísi en ég hafði búist við. Verulega flottur leikur)
I Kine spiser de hunde (sá hana í annað sinn og það er bara skylda að sjá þessa mynd)
Adams Æbler (önnur dönsk ræma sem ég sá um helgina. Snilldarmynd og eins og myndirnar hér að ofan ætti að fara amk einu sinni í gegnum sjáaldur hvers og eins)

Ég kveð að sinni og þakka þeim sem lásu.

Arnar Thor í slökun og mjaðmavexti

PS: Heyrði í Ásrúnu um helgina og Rúnu dóttur hennar. Alltaf jafn ánægjulegt. Ásrún, takk fyrir spjallið og fyrirgefðu að ég truflaði matargerðina...3.7 kíló af þorski á færibandinu þokast nær...

A

hmmm

2008-03-10T23:13:00.000+01:00

já mættur enn á ný.

Tiltölulega í lagi þessa dagana. Pínu lasinn, en er farinn að borða reglulega á ný...enda kílóum farið að fjölga og mál að sinni. Stefnan sett á kjörþyngd fyrir páska...egg.

Ég var...að ég hélt, mjög nálægt því að landa starfi hjá Kögun á Íslandi en fékk því miður ekki starfið, enda er Íslandið bara of lítið fyrir egóista eins og mig. Ég varð súr í svona korter og einn dag en er kominn í gang á ný með sama bullið og neðanbeltishúmorinn er kominn í "full swing".

UPS þrælabúðirnar halda áfram, en með hæfilegum skammti af nálum undri táneglur þá er þetta ekki lengur svo slæmt.

Borðaðið glimrandi fínan túnfisk í dag sem var wunderbar. Þakka demantsvejdrottningunni fyrir það. Stefni á glimrandi kvöld á morgun þegar Inter Milan tröllið verður endanlega lagt að velli af Fish and Chips félögum mínum frá LifrarPolli. Helgi Bláber ætlar að kíkja og ég hlakka bara til. Kannski maður taki til og fjarlægi rústrauða litinn af klósettinu.

kveðja í bili,

Arnar Thor

Sunnudagur

2008-03-02T15:48:00.000+01:00

Hæ,

Dagurinn í dag hefur farið í kaloríu inntöku, uppvask og uppeldisstörf. Yngsta kennitalan á heimilinu hefur ekki verið sáttur við uppeldisaðferðir föður og kallar mig aulakúk reglulega. Það passar ekki alveg því hægðir hafa verið eins og venjulega. Vonandi sér hann að sér pilturinn og kallar mig eitthvað annað næst...kannski pabbi.

Anyway, Alexander bakaradrengur er núna að bíða eftir að súkkulaðibitakakan verði klár. Hann hreinlega elska að baka og það er svo sem í lagi en hefur ekki góð áhrif á BMI töluna mína. Stefni á að fara að alvarlega að taka mig saman ef BMI tala og líkamshiti verður sú sama.

Ég bið að heilsa í bili...grunar að fljótlega muni ég skrifa eitthvað merkilegra enda ýmislegt að malla í kötlunum.

kveðja,

Arnar Thor

Should I stay or should I go...

2008-02-26T20:03:00.000+01:00

Hæ,

Fátt að frétta héðan nema þá kannski að ég er svona að leita mér að annarri vinnu. UPS hefur verið góður skóli, en vinnutíminn er ekki til að hrópa húrra fyrir og allt supportið minnir óþægilega mikið á dagana í Friskvinnslunni.

Ég er alveg á báðum áttum eða í öllum áttum hvað ég á að taka mér fyrir hendur. Á maður að fara á Klakann, flytja til Köben eða gerast limbódansari á Jamaica?

Að öðru leyti þá gengur lífið sinn vanagang. Hægðir eru góðar og sjónin ennþá innan hættumarka.

Endilega látið mig nú vita hvað ég á að gera í atvinnumálum, því ég er búinn að prófa sjálfval í lottókassanum, en fæ bara einhverjar tölur...spurning hvort að ég þurfi að taka þversummuna og vinna út frá því...talandi um þversummur þá væri gaman að eiga símaskrá sem innihéldi bara þversummur.

Lifið heil og munið að það er líf eftir vinnu.

Sultuhundur

2008-02-12T21:56:00.000+01:00

Hæ,

Var að fá gælunafnið sultuhundur...ekki viss hvað mér á að finnast...en alltaf heiður...held ég. Ferskjumarmelaði er æskilegt.

Annars er fátt að frétta. Ég er búinn að keyra um Jótlandið eins og MóFó. Fyrirtæki sem ég hef heimsótt upp á síðkastið eru Danfoss, RedGreen, Bosweel og fleiri. Ansi gaman að sjá flóruna hjá Dananum. Þeir eru á uppleið blessaðir þó landið sé ekki nema um40% af stærð íslands svona give or take.Þeir eru bara ekki að ná þessu blessaðir.

Að lokum vil ég benda konum á að rétturinn til að ropa á almannafæri er alfarið karla. Þið fenguð rað.....næginguna svo endilega leyfið okkur að halda einhverju eftir.

kveðja,

Arnar Thor

Laugardagsþynnka

2008-01-27T01:19:00.000+01:00

Hæ,

Fór á alveg glimrandi skemmtilegt "reunion" með skólafélögum hérna úti í Danmörku. Suma hafði ég ekki séð síðan vorið 2006. Við átum og drukkum öl og fórum í pakkaleiki...svona síðbúið danskt jólahlaðborð. Ég vann þennan fína bol frá Microsoft sem ég svo auðvitað gleymdi hjá gestgjafanum. Um miðnættið var ég búinn með batteríið, enda bara búinn að sofa um 3 tíma nóttina á undan. Ég ætlaði heim en var stoppaður og hreinlega skipað að halda áfram að kneyfa ölið. Jæja ég lét undan og þetta var ferlega gaman, en þynnkan á eftir var ekki sértaklega skemmtileg. En nú er ég kominn á ról á ný og farinn að blogga smá báðum lesendum til mikillar gleði...vonandi.

Í gær heyrði ég af ansi áhugaverðum leik sem ég þó mun ekki stunda. Leikurinn gengur út á það að 2 eða fleiri karlmenn koma saman. Feimni er ekki æskileg. Einn heldur á kexköku og svo á annar að losa um tauma svo að fjölskyldudjásnið komi fram í fullum skrúða. Svo er djásnið pússað þar til eigandinn telur að djásnið sé klárt. Þegar svo er kallar hann á kexhaldarann sem svo hendir kexinu í loftið. Leikurinn gengur svo út á það að skjóta frá djásninu og reyna að hitta kexið. Ef svo heppilega vill til að kexið öðlist glassúrhúð þá á kexhaldarinn að innbyrða kexið.
Mjög áhugavert og ég vona að það séu einhverjir þarna úti sem hafa stundað þetta. Sé fyrir mér atvinnumennsku í þessu þar sem kexverksmiðjan Frón væri aðalstyrktaraðili. Hugsanlegir styrktaraðilar væru svo þeir sem framleiða fægiefni fyrir nefnd fjölskyldudjásn.

Að öðru þá er það að frétta að Danir eru í skýjunum yfir afrekum handboltaliðsins. Verður gaman að sjá hvað gerist á morgun.

Ég ætla að halda áfram að glápa á kassann. Var að klára eðalmyndina Blades of Glory og svo einhverja feel good mynd sem heitir No Reservation...varð reyndar glorhungraður eftir þá mynd. Núna er sænska ríkissjónvarpið að spila Zorro og ég held að ég láti það svo vera lokin á þessu glápi.

Ég bið að heilsa í bili.

A

Þriðjudagsþruman

2008-01-15T22:21:00.000+01:00

Fékk svona heiftarlega í magan...fannst ég þurfa að segja frá því. Gleðin og hamingjan er í þessum litlu stundum í lífinu.

Lifið heil.

Arnar Thor

vika númer 1 búin af 2008

2008-01-07T00:05:00.000+01:00

hæ,

Jæja vika númer eitt búin og einungis 50 vikur til jóla og 51 vika í áramótin. Merkilegt nokk.

Annars er það að frétta að Alexander kvaddi jólin með alveg hrikalega góðri súkkulaðiköku. Pilturinn er bara magnaður í bakstrinum og framtíðin er björt. Ég bakaði gulrótarköku sem endaði í ruslinu því hún var ekki tvífætlingum bjóðandi. Mín eina von er að hún ilmi vel í kötlum ruslakarlanna á komandi vikum.

Dagurinn endaði á ljómandi hangikjöti hjá Heiðu og svo skíttapaði ég í Rommí á meðan ljúflingarnir mínir horfðu á snilldarteiknimyndina Ratatoullie. Mynd sem fær tárin fram hjá mér.

Ég bið að heilsa í bili...by the way ef þið hafið einhverja vinnu handa mér sem veitir meiri gleði en hjá UPS þá er það vel þegið.

A

Jóla og áramótapistill

2007-12-31T12:26:00.000+01:00

Jæja þar kom að því. Ég ætlaði mér að senda pistilinn á ættingja og vini í gegnum tölvupóst en ætla að svíkja það allverulega og krota á bloggið í staðinn.

Ég er núna staddur í Stokkhólmi, kom í gær, og dvel hjá Helga, Söru og þeirra krílum. Búið að vera ljúft og gaman að fá að smakka á svínakjötspottréttinum...held að ég hafi ekki fengið svona áður.
Í kvöld verður svo íslenskt lambalæri og for og eftirréttir með öllu tilheyrandi. Svo verður himininn reykmettaður með kínverskum eldmat. Anyway, best að gera upp árið svona lauslega.

Jólapistill 2007.

Árinu má skipta upp í 4 hluta: Atvinnuleysishlutinn, Rómarhlutinn og svo UPS hlutinn. Eins og glöggir menn sjá þá eru hlutarnir bara þrír en vegna þess hve skattkerfið í Danmörku er svo flókið þá verð ég að hafa virðisaukann með. Þau ykkar sem lesið þetta fyrir utan Danmörku fáið þetta vissulega án virðisauka.

Atvinnuleysishlutinn:
Árið hófst rólega. Ég var nýbúinn með skólann og tiltölulega sáttur við Guð og menn. Ég átti ekki bót fyrir rass, en var svo heppinn að fá smá atvinnuleysisbætur frá svokölluðum A-Kassa í DK. Janúar og Febrúar fóru ansi mikið í að bíða eftir endanlegu svari frá Alþjóðamatvælastofnuninni í Róm, þar sem mér hafði óbeint verið lofuð vinna í 6 mánuði. Ekkert varð svo úr því og ég frétti síðar að þar hefði ég orðið undir í pólítískum leik þar á bæ.
Þessi tími frá Jan til miðjan Apríl var frekar ömurlegur satt að segja. Ég gerði fátt af viti. Tók bara við atvinnuleysisbótum og reyndi að halda lánadrottnum í skefjum.
Ég fór í stutta ferð til Íslands í Janúar og það var ferlega ljúft. Tókst reyndar að fá sekt fyrir að aka yfir á rauðu, en annað merkilegt náðist nú ekki á skrá í þeirri ferð.

Á þessum tíma var ég að vinna í hinu og þessu og má þar nefna gardínugerð, lagerstörfum, póstflokkun og svo mötuneytisstörf. Ég verð að segja að vikan í mötuneytinu þar sem ég við annan mann (konu) sá um morgunmat og hádegismat var ansi skemmtileg.

Svo gerist það á fimmtudagskvöldi í Apríl mánuði að Björgvin Sigurðsson fyrrum vinnufélagi minn hjá Friðriki Skúlasyni og þáverandi starfsmaður Alþjóðamatvælastofnunarinnar hefur samband og spyr hvort ég vilji koma sem fyrst. Sem fyrst þýddi raunar mánudagurinn á eftir. Það þurfti bara að leysa smá mál varðandi læknisvottorð. Heppilega þá gat ég fengið Helga vin minn til að krota á blað þar sem hann var nú nýbúinn að sjá mig árinu á undan. Ég var allt í einu á leið til Rómar.

Rómartíminn:

Róm var hreinlega æðisleg. Vinnan var skemmtileg og fólkið skemmtilegt og svo kynntist ég Björgvini og frú betur og það var nú ekki leiðinlegt. Ég er enn með hvítlauksbragðið í munninum eftir kræklingaveisluna hjá þeim. Grappabragðið er þó ekki eins ljúf minning.
Ég get ekki miklu meira við þessu bætt, en að fá tækifæri að vinna í Róm er bara frábært. Sagan draup á hverju strái og eitthvað sem ekki er hægt að lýsa. Meira svona sem verður að upplifa.

Tiltölulega snemma eftir að ég kom til Rómar fékk ég símhringingu frá manni hjá UPS á Norðurlöndunum þar sem þeir vildu fá mig í viðtal sem fyrst. Eitthvað hefur símasexið mitt virkað vel á hann því hann var tilbúinn að bíða með viðtalið þar til ég kæmi heim tilbaka í lok maí. Ég þurfti þó óvænt að fljúga til DK í skotferð og reddaði viðtalinu á sama tíma.

Eftir Rómartímann flaug ég til London og hitti matarklúbbsfélaga mína og það var hreint út sagt meiriháttar ferð.

Þegar ég kom svo loks heim til DK þ. 21. maí, fékk ég svo símtal frá fyrrnefndum UPS manni sem bauð mig velkominn til UPS. Ég hafði verið valinn.

UPS hlutinn:

Eitthvað virðist hafa verið snúið fyrir starfsmannahald UPS að hafa "hald" á mínum ráðningsmálum því það tók ekki nema 5 vikur að fá loks að byrja hjá UPS. En jú loksins fékk ég að byrja. Tony Markovski var minn yfirmaður og ég átti 6 aðra vinnufélaga í minni deild. Það verður að segjast eins og er að vinnan er ekki alveg það sem ég hafði óskað mér og fyrstu 2-3 mánuðirnir voru bara þrælstrembnir. Ég var kominn inn í bjúrókratparadís kapítalismanns og er þar enn. Vinnufélögum fækkaði verulega og nú í lok árs erum við bara 4 eftir í deildinni.
Mér gengur betur í vinnunni og það er töluvert betra fyrir sálina að vera loksins farinn að vinna á skuldasúpunni og þar ættu hlutirnir að vera komnir í góðan farveg á næsta ári.
Tíminn hjá UPS hefur verið mjög góður þar sem maður hefur fengið eldskírn í frekar hörðum heimi samkeppninnar.

Að lokum:

Árið að mínu mati hefur verið nokkuð erfitt, en þó margir ljósir punktar. Rómar og London ferðirnar standa upp úr ásamt því að ég skrapp í viku með börnin til Íslands í haust.

Ég stefni að því á næsta ári að koma mér í aðra vinnu og vonandi verður það komið í höfn með sumrinu.

Ég þakka fyrir árið og ef þið hafið náð að lesa þetta langt þá segi ég til lukku með það, því ég sjálfur hætti að skrifa töluvert fyrir ofan.

Gleðilegt ár og takk fyrir allt það gamla.

kveðja,

Stokkhólmur, 31. Desember, 2007...

Arnar Thor

Jólakort aflýst í ár vegna tæknilegra örðugleika.

2007-12-09T19:10:00.000+01:00

Komst að því í dag að blekið í pennanum mínum var búið og filman í stafrænumyndavélinni var búin. Af þessum sökum og kannski nokkrum í viðbót fáið þið örfáu sem lesið þetta blog ekki jólakort í ár. Þetta leysir ykkur hins vegar engan vegin undan þeim skyldum að senda kort til mín :)

Hinn árlegi jólaannáll mun að sjálfsögðu vera birtur hér fyrir jól og þau ykkar sem vilja fá hann í tölvupósti, og þá eiginlega fáið þið jólakort, endilega setjið tölvupóstfang ykkar í "kommentin".

Með von um skilining,

Arnar Thor

Of mikið af kúlusúkk og mánudagur

2007-11-26T21:11:00.000+01:00

Hæ,

Úff já tók áðan "overdoze" af kúlusúkki og hreinlega líður bölvanlega. Skil ekkert í mér að gleypa þetta allt saman.
Það er hreinlega brjálað að gera og vesalingurinn hann Hellingur fær ekki að skína eins og ég vonaði.
Pabbi kemur á fimmtudaginn og ég hreinlega á eftir að þrífa alla lífhimnuna af gólfinu...ég vona að hann komi eftir myrkur og vakni fyrst í myrkri...og já þoli lyktina.

Ég á að halda smá kynningu fyrir Danfoss á miðvikudag og verð að viðurkenna það að ég er bara nett stressaður. Svona sölufundir eru svo mikið leikhús stundum. Ekki sýna veikleikamerki því þá ertu í vörn allan tíman. Mér verður títt hugsað til Survivor þáttanna þegar ég sit svona fundi. Tveir pólar mætast og vilja magna sinn segul, sá sem dregur fleiri skildinga að sínum pól vinnur.
Er stundum að velta því fyrir mér hvort að ég sé virkilega guttinn í þess háttar póló.

Anyway, sá alveg ágætis ræmu í gær Troy. Pitturinn stóð sig vel sem hinn hælsærði Akíles. Einnig sá ég fína mynd í síðustu viku með Johnny Depp og sú mynd heitir Blow.
Svo er ég að lesa ágætis bók sem heitir Hundshöfuð. Íslensk þýðing á danskri bók, sem hefur vakið töluverða athygli. Vel skrifuð.

Að lokum verð ég að minnast á tónleika sem ég fór á síðasta föstudag. Fór með Demantsvejdrottningunni og naut tóna frá hljómsveit sem heitir Saybia. Alveg hreint frábærir tónleikar. Á undan var unglingaband sem heitir The late parade sem voru skemmtileg. Sérstaklega var gaman að fylgjast með trommaranum. Ung stúlka sem notaði nú ekki alltaf trommukjuða til að slá á drumburnar. Kannski pínu stefnulaust hjá nefndri skrúðgöngu, en lofaði góðu. Söngvarinn var virkilega góður. Kannski upprennandi stjörnur hver veit.

Ég kveð ykkur í bili.

Prufa

2007-11-22T23:04:00.001+01:00

Hæ aftur,

Nú er ég að prófa að blogga í gegnum Windows Live Writer. So far so good.

Annars það að frétta að vinnan er að skemma fyrir mér félagslífið.

kveðja í bili,

Arnar Thor

Hellingur part 2

2007-11-18T15:11:00.000+01:00

Nóvember rann í hlað og áður en nokkur varð var við var kominn miður og jafnvel því miður nóvember. Ljósum fjölgaði í bænum og bæjarbúar smelltu enn fleira af dótinu sínu út í gluggann. Hellingur rölti seint um kvöld, líklega sunnudagskvöld, því lífið í bænum var með eindæmum dauft. Enn og aftur fann Hellingur sig standandi fyrir framan flóðlýstan glugga með ótrúlegasta dóti. Hann heyrði eitthvern eða eitthvað nálgast. Hellingur varð pínu smeykur. Hljóðið nálgaðist og nálgaðist. Sama hvað Hellingur reyndi að ganga frá hljóðinu þá færðist það nær.

Hellingur var alveg að komast heim í hellinn sinn, en skrikaði fótur á majónesklessu á stéttinni, einmitt hluti af stærri klessu sem var á borðum hjá Gunnari Kaupmanni sem bjó þar hjá. Gunnar var nýorðinn 60 ára og hafði notið þess í mörg á að mjólka bæjarbúa með ódýrum raftækjum. Gunnar var kannski ekki vondur maður, en hann borðaði mikið af majónesi. Hjartað hans var hulið majónesi og fékk ekki tækifæri til að slá blóði út í kærleiksæðarnar.
Jæja, þetta var nú útúrdúr...Hellingur lá á stéttinni með sært stolt. Að tapa fyrir majónesi var ekkert til að hrópa húrra yfir. Hann hafði einu sinni tapað fyrir fitulitlum sýrðum rjóma, en hann náði nú hefndum síðar. Förum ekki út í það.

Hellingi var allt í einu kippt á fætur. Það var eins og honum væri lyft upp af stórum byggingarkrana. Byggingakraninn reyndist þó vera góðlegur karl, frekar bústinn, með heljarmikið hvítt skegg og klæddur í rautt. Belti bar hann hér um bil um sig miðjan og skórnir hans voru úr glansandi svörtu leðri. Hellingur fann þessa yndislegu kanil og súkkulaði lykt og velti því fyrir sér hvort að góðlegi stóri karlinn notaði aðra tegund af svitalyktareyði.

Hellingur sá að góðlegi karlinn var með blik í augum, en þó einhver depurð með. Hellingur spurði "Hver ert þú?"

Framhald síðar.

Setning

2007-11-15T07:30:00.000+01:00

Hæ,

Heyrði þessa setningu í gær:

"Prófaðu að pota í miðjuna" og satt að segja þá hentar hún ekki við öll tækifæri. Þetta er svona "had to be there" dæmi.

Annars er fátt að frétta. Ég verð í köben í dag og fram á laugardag. Framundan er söluráðstefna og svo matur og svo jólahlaðborð á morgun með öllu sölugenginu. Ég sjálfur er svona varla að nenna þessu vegna hor og slefu, en ætla að sjá hvort að ákavítið hafi ekki heilandi áhrif.

Náði loksins að krumpa saman CV til að senda á klakann og svo er smá áhugi frá Köben varðandi vinnu þar, en ég tek þessu með jafnaðargeði, en það er ljóst að ég hef ekki áhuga á að vera allt of lengi á launaskrá hjá núverandi atvinnuveitanda.

CV skrifin eru skemmtileg eða hittó...maður dettur í það að vera of háfleygur eða hreinlega bara of stuttorður, en svo má þetta ekki vera of langt heldur.

Datt í hug að setja eftirfarandi undir áhugamál:

"borða fyrir framan svangt fólk, ofsækja minnimáttar og þá helst örvhenta sem eru án alls vafa andlega fatlaðir, þekki einmitt einn sem þjáist af þessu og hefur aldrei beðið þess bætur. klám og svo síðast að prufa yfirdráttarþol greiðslukorta."

Ég lagði álíka texta undir sérlegan atvinnuráðgjafa minn, já by the way takk fyrir quacamólið, sem að vel athuguðu máli ráðlagði mér að setja annan texta.

Jæja, nú er verið að sækja mig og Köben næst á dagskrá.

Endilega setjið komment á síðuna mína og þá helst þeir sem aldrei lesa bloggið mitt. Ég er að vinna að svolitlu tölfræðiverkefni hérna.

kveðja,

Arnar Thor

Hellingur

2007-11-10T12:00:00.000+01:00

Jólasagan um Helling (framhaldssaga)

Í litlum helli bjó maður sem var kallaður Hellingur. Honum leið bara nokkuð vel í sínum helli. Þarna var hann með kapalsjónvarp, eldavél, hraungjallsútsýni og fáeinar myndir af fjölskyldunni. Þessi hellir var nokkuð merkilegur því hann var alveg við miðbæinn og stutt fyrir Helling að skreppa inn í bæinn í skjóli nætur og virða fyrir sér undursamlegar flíkurnar sem bæjarbúar einhverra hluta vegna sýndu í gluggunum. Þarna var líka hægt að sjá sjónvörp og alls konar raftæki. Hellingur skildi ekki af hverju fólkið hafði þetta ekki bara inni hjá sér. Hann klóraði sér títt í hausnum, en skaust svo heim ef hann varð var við einhvern. Veturinn var að koma og myrkrið skall fyrr á og næturnar urðu lengri. Hellingur varð stundum einmanna á þessum tíma, en sárabót þó að bæjarbúar settu jafnvel fleiri hluti í gluggana sína á þessum árstíma.

Framhald síðar...

Annars er bara fínt af mér að frétta. Er að skoða hvað ég skal gera í framtíðinni...í nánustu framtíð mun ég steikja önd, elda kartöflur, gera vínberjasalat og svo góða rauðvínssósu. Börnin mín koma í mat í kvöld.

Jólasagan um Helling mun halda áfram síðar...

Íslandsheimsókn 2007

2007-10-21T12:39:00.000+02:00

Hæ,

Jæja nú er þessari heimsókn að ljúka. Ég kom fyrir viku síðan með krakkana mína og við höfum reynt að hitta sem flesta, en allt of margir verða að bíða þar til næst. Við erum búin að hafa það gott og yfivigtin er rífleg eftir íslenskar hnallþórur og ket. Við þökkum kærlega fyrir oss og Dísa er alsæl yfir því að hafa uppgötvað rækjusalat. Ég er alsæll yfir því að hafa fengið smá Ísland í æðarnar. Aldrei að vita nema maður setjist hér að síðar meir.

Við höfum tekið góðan túrista á þetta í þetta sinn. Fórum í Perluna á sýninguna þar, í laugarnar, á nokkur kaffihús og svo auðvitað í ToysRus....ehmm já eins og hinir bjánarnir.
Ég fór svo á skrall með Steina vini mínum og satt að segja varð bara pöddufullur, en Guð minn almáttugur það var gaman að bulla. Þynnkan var ekki eins fyndin.

Allir þeir sem við heimsóttum þökkum við kærlega fyrir ljúfar móttökur og þið hin sem við náðum ekki að heimsækja. Þið bara frystið kökurnar og við tökum þær næst ;)

kveðja,

Arnar Thor og erfingjarnir.

Setið að sneiðingi og stífkrampi

2007-10-04T23:15:00.000+02:00

HÆ,

Jæja gott fólk þá er komið að því að blogga smá.

Þemað í dag er dauðinn og beittir hnífar og svo auðvitað stífkrampi. Það vill nefnilega þannig til að ég mitt í gleði minni við að búa til pastasalat í fyrradag, sneiddi ég væna flís af þumli vinstri handar. Það blæddi ansi mikið og þar sem að mér fannst blóðið farið að vera fullmikið ákvað ég að taka túr á skadestuen. Þar fékk ég frekar snögga þjónustu, sem er reyndar óvenjulegt hér í bæ. Sárið reyndist nú ekki alvarlegt sem betur fer og ég fékk bundið um þumalinn og svona í leiðinni fékk ég stífkrampasprautu, svona just in case. Og það var nákvæmlega það sem þetta var...stífkrampasprauta, því daginn eftir á leiðinni heim fékk ég þennan fína brjóstverk vinstra megin og sá verkur ágerðist bara. Undir kvöld var mér nú ekki orðið sama og fékk þetta fína panic attack og skellti mér á læknavaktina. Sem betur fer er pumpan í lagi, en samkvæmt lækninum þá er ekki ólíklegt að stífkrampasprautan hafi hjálpað til með verkinn ásamt stressi...vöðvabólgudæmi. Anyway, líður vel í dag, en ég neita því ekki að ég var nú orðinn doldið smeykur þarna á tímabili.

Framundan er svo helgi og svo Þýskalandið á mánudag.

kveðja,

Arnar Thor

Nekt

2007-09-20T22:20:00.000+02:00

Í kvöld kom fram eftirfarandi pæling: Af hverju setur Andrés Önd handklæði um mittið þegar hann kemur úr baði?

Nekt er skemmtilegt fyrirbæri. Fátt skemmtilegra en að horfa út frá svölunum og finna svalann andvaran leika um djásnin. 4 hæð er heppileg staðsetning.

Annars er fátt að frétta. Helgi framundan og ég er frekar sáttur við það. Ég er búinn að kynnast dönsku landslagi fullmikið síðustu daga út um bílrúðu á frönskum bíl. Ég villtist í gær og það var annars gott því ég loksins rambaði á blessað Himmelbjerget. Það má segja að ég hafi keyrt um dönsku alpana í gær.

kveðja í bili,

Arnar Thor stundum nakinn og stundum ekki.

Föstudagsblogg

2007-09-14T22:52:00.000+02:00

Hæ,

Veðrið hérna á Fjóni er samt við sig. Rigning, rok og tóm leiðindi. Satt að segja verður að viðurkennast að veðurguðirnir hafa eitthvað á móti Dönum þetta árið og hafa ákveðið að skola vel til. Ég hélt lengi vel að æfingavöllur veðurguðanna væri Miðnesheiðin á Reykjanesskaganum, en lítur út fyrir að æfingar séu stundaðar víðar.

Dagurinn í dag byrjaði nokkuð venjulega. Mætti í vinnuna en stoppaði stutt og sótti Dísu í skólann. Hún var að koma úr skólaferðalagi og ljómaði. Kennarinn hennar var líka í glimrandi skapi, sem er aðdáunarvert þar sem að hún eyddi 2 dögum með 30 8 ára gríslíngum sem geta fengið harðasta Tétjéníu hermann til að leggja niður vopnin og setja á sig svuntu.

Á morgun stefni ég á að fjarlægja eitthvað af lífhimnunni heima hjá mér og kannski brjóta saman þvott. Skil ekki af hverju menn geta ekki fundið upp á fatnaði sem gengur frá sér sjálfur þegar straufrítt tau hefur verið til lengi í hinum vestræna heimi.

Að lokum góð pæling frá Brainiac: "Verða fiskar einhvern tímann þyrstir?"

Ég óska ykkur góðrar og vindverkjarlausri helgi.

Arnar Thor

Uppköst og íslandsför

2007-09-11T21:53:00.000+02:00

Hæ,

Hef faðmað postulínsaltarið í dag og losað vel úr iðrum. Góður dagur til að kynnast sjálfum sér og "líkamsklukkuna". En já er allur að koma til og held að ég geti borðað eitthvað annað en Cheerios á morgun.

Að öðru þá hef ég ákveðið að skella mér á klakann með gríslíngana mína í næsta mánuði. Við komum 13. október og verðum í viku. Frjáls framlög vel þegin og svefnpláss.

Lifið heil.

Arnar Thor

Lífsstarfið loksins fundið!!!

2007-09-10T22:15:00.000+02:00

Ég ætla að verða "post talent spotter" eða uppgötva hæfileika hjá fólki sem hefur verið uppgötvað. Algjörlega óplægður akur.

Að öðru leyti er allt í gúddi. Hægðir góðar og ég er farinn að pissa á ný.

kveðja,

Arnar Thor

bloggedi blogg og hana nú

2007-09-04T20:50:00.000+02:00

Hæ,

Jæja, best að blogga smá. Vinnan gengur ágætlega. Þarf að fá mér eins og 3 túbur af skipulagningur og 8 túbur af sjálfsaga og þá er þetta komið. Yfirmaður minn blessaður er að hætta. Ég get ekki sagt annað en að hann hafi verið ágætur blessaður. Mér var meinilla við að hitta hann í upphafi. Hann var ferlega kröfuharður blessaður og það hreinlega frussaðist frá honum sjálfstraustið. Ætli ég hafi ekki bara verið hræddur við sjálfan mig. eða eitthvað...jæja nóg komið af sálfræðinni.

Er sem sagt kominn heim í gamla góða draslið mitt. Gott að sumt breytist ekki. Orðið lífhimna hefur öðlast nýja merkingu á mínu heimili. Ég hef ekki skúrað í fleiri mánuði og það er komin þessi fína "lífhimna" á gólfið. Held reyndar að þetta verndi trégólfið fremur en annað. Ein leið til að fá trégólf til að anda.

Framundan eru frekar spennandi tímar. Pabbi og Erla koma hingað til DK eftir 2 vikur og svo tek ég viku frí í byrjun október og fer aftur í vikuferð til Þýskalands vikunni á undan.

Að öðru leyti hef ég það fínt. Er doldið einmanna stundum ég neita því ekki. Sakna klakans dálítið þessa dagana. Kaffi hjá vinum og vandamönnum og rölt í miðbæ Reykjavíkur með Kaffitár í hönd. Þegar ég spá í það þá eru ótrúlega margar minningar hjá mér tengdar kaffi.

Af dönum er það að frétta að þeir undirbúa sig af kappi fyrir kappleik í Svíþjóð. Framtíð danskrar knattspyrnu er í uppnámi og þeir verða að vinna. Skattar munu lækka en samt ekki lækka ... var að reyna að fá botn í þetta í gær þegar ég glápti á fréttirnar.
Umferðin tekur einn á dag samkvæmt nýjustu fréttum og samkvæmt því sem ég sé daglega á hraðbrautunum hérna þá kemur það því miður ekki á óvart.

Ef ykkur leiðist þá megið þið endilega senda mér línu, hringja eða gefa mér nammi....ekki endilega í þessari röð.

Lifið heil og áfram Ísland.

Arnar Thor

fortíðarvandi

2007-08-30T17:15:00.000+02:00

Ég er að vinna hérna með einum breta sem er ansi skemmtilegur. Hann sagði mér allt í einu í gær ástæðuna fyrir því af hverju hann væri svona skrítinn:

"when I was little my hair caught on fire, and my mother had to put out the fire with a baseball bat."

Ansi skondið.

Lifið heil.

Arnar Thor

Þýskalandsblogg

2007-08-28T12:06:00.000+02:00

Hæ,

Jæja, þá er ég staddur í Þýskalandi og verð þar fram á föstudagskvöld. Ég er á ægilega fínu hóteli í Bochum. http://www.wugh.de/. Ofsalega fallegt svæði og skógi vaxið allt í kring. Ég er að velta fyrir mér að fara út að skokka í kvöld. Eina sem ég hef áhyggjur af er að villast, en ég hef fundið pottþétta aðferð og vil benda Hans og Grétu á hana líka. Trikkið er að telja tréin á meðan þú skokkar og svo á bakaleiðinni telur maður tréin afturábak. Þannig að tré númer 1 ætti að leiða mann að upphafsreit. Ég blogga síðar...ef það er langt í næsta blogg þá vitið þið að ég er amk úti að skokka.

Lifið heil.

Arnar Thor

Sunnudagsblogg

2007-08-12T11:01:00.000+02:00

Hæ,

Jæja, hér sit ég og get annað. Sunnudagur kominn upp á ný og virðist bara líta ágætlega út. Grámosinn glóir á himninum og það er bara ágætt. Eins og flestir vita þá er ég byrjaður að vinna hjá hraðsendingaþjónustunni UPS og hef nú verið þar í rúman mánuð. Ég get ekki sagt annað en að þetta er mjög krefjandi vinna og reynir vel á suma andlega vöðva sem ég hef ekkert ræktað síðustu árin. Ég keyri mjög mikið og hef náð að aka 5 til 6 þúsund kílómetra síðustu vikur.
Ég held áfram baráttunni við verkefnin og kannski smá sjálfan mig.

Annars er nú það að frétta að krílin mín öll eru nú loks á einum stað saman. Þau eru hjá mér núna þessa helgi og í gær áttum við virkilega góðan dag. Við heimsóttum Ragga, Mundu og Co sem hafa leigt sumarbústað á Jótlandinu. Þar var nú tekið á móti okkur með kaffi og með'í og svo skelltum við okkur í sund. Ein skemmtilegasta rennibraut sem ég hef farið í var heimsótt. Reyndar mæli ég ekki með henni fyrir flogaveika.
Eftir sundið skelltum við okkur upp í bústað á ný og þar fengum við glæsilega nautasteikur á diskana og í lokin fengu krakkarnir grillaða sykurpúða og foreldrarnir fengu nammi sem krökkunum var talið trú um að væri fullorðinsnammi ;-)
Virkilega skemmtilegur dagur og gaman að hitta Tottenham manninn Ragga þrátt fyrir tap þann daginn. Helgi getur grátið honum til samlætis.

Fyrir rúmlega viku síðan hitti ég svo Hjölla bróður á knattspyrnuvelli hér í henni Danmörku. Fór á leik með Keflavík á móti FC MidtJylland. Þetta var mjög skemmtilegt. Fékk að sitja í VIP stúku og borða fínan mat fyrir leik. Mér þótti þetta stórmerkilegt og ferlega ljúft. Leikurinn var svo fín skemmtun. Mínir menn náðu að pota tuðrunni í mark heimamanna og leit lengi vel út fyrir að þeir færu heim með sigur, en fríkadellu og rauðsprettuæturnar náðu að setja 2 mörk inn og fóru áfram í keppninni á fleiri mörkum skoruðum á útivelli. Keflvíkingar geta þó verið stoltir. Stóðu sig vel.

Daginn eftir hitti ég svo Hjölla og Siggu Dís í Köben. Við Matthías skelltum okkur í kvöldferð til Köben og fórum út að borða og svo tókum við Matthías lestina heim seint um kvöldið.

Jæja, læt þessu lokið í bili og skrifa kannski eitthvað í vikunni.

kveðja,

Arnar Thor UPSari

Groundhog Day

2007-08-05T22:12:00.000+02:00

Sá Groundhog day aftur núna í kvöld. Bill Murray með leiksigur í einni bestu mynd sem hefur verið búin til.

Fær mann heldur betur til að hræra upp í marmaranum þarna uppi.

kveðja,

A

Vinur minn er með erfðagalla

2007-07-31T18:58:00.000+02:00

HÆ,

Fékk þær fréttir í dag að góður vinur minn og fleiri til eru með erfðagalla...

http://mbl.is/mm/frettir/togt/frett.html?nid=1282937

Reyndar var ágætt að frétta þetta því maður hættir þá leitinni að vandanum. Var farinn að hafa áhyggjur af þessu ég verð að segja það. [hönd strokið í gegnum hár]

kveðja,

Arnar Thor

Nýr blogglinkur

2007-07-20T07:40:00.000+02:00

Hæ,

Vegna fjölda áskorana (1) hef ég sett hana Addý vinkonu mína á listann yfir Fleiri blogg á veraldarvefnum. Endilega lesið og njótið.

kveðja,

Arnar Thor

Stjörnuspá dagsins

2007-07-13T11:44:00.000+02:00

Hrútur: Þú er að mynda betri sambönd í vinnunni. Þú verður ekki dreginn upp í næsta þrep framastigans. Samstarfsfélagar þínir munu lyfta þér þangað.

Ekki leiðinleg spá. Annars er ég nú lítið að blogga þessa dagana. Mikið að gerast og ég blogga þegar ég finn almennilegan tíma í slíkt...ólíkt því sem Addý heldur :)

kv.

Arnar Thor

"When you want something done ask a busy person"

2007-06-20T23:57:00.000+02:00

Yfirskriftin hér að ofan er held ég bara nokkuð sönn. Ég hef verið meira og minna aðgerðalaus síðan í janúar og satt að segja þá er þetta bara ekkert gott fyrir sálartetrið.

Ítalíuferðin var þó sárabót í annars litlausa tilveru. Anyway, ég er sem sagt að fá vinnu hjá UPS og hefði átt að byrja 1. júni, en vegna tafa á að koma mér inn í kerfið, sem er of langt að telja upp hérna, þá er ég ekki enn byrjaður. Ég fór að vísu í heimsókn á tilvonandi vinnustað og hef fengið lesefni heim. Ég verð nú að viðurkenna það að þetta er nú nett pirrandi. Kærkomið frí segja einhverjir eða njóttu frítímans...nei takk...ég vil fara að gera eitthvað, gallinn er sá að þegar maður hefur svona mikinn tíma þá gerir maður bara andsk...ekki neitt. Þið megið kalla mig letingja eða álíka, en ég bara nenni engu og á bara ansi erfitt stundum að rífa mig upp...nema ef ég er að búa til samlokur eða mat ;) Manni finnst maður ekki hafa neinn agalegan tilgang í lífinu þegar maður er í endalausri biðstofu. Guð ákvað nú að létta á mér kvölina aðeins í dag með því að hleypa mér strax í stólinn þegar ég fór til tannlæknis í dag og þakka ég fyrir það.

Annars er fátt að frétta af mér. Búinn að lesa nokkrar skemmtilegar bækur og er að lesa skemmtilegar bækur. Mæli með Sendiherranum eftir Braga Ólafs og svo er ég að lesa eina núna sem heitir á íslensku líklega Höfuð elskhuga míns eftir Ingrid Noll...prýðilegasta bók. Svo verður fólk að lesa Stutt ágrip af sögu traktorsins á Úkranísku. Snilldarbók.

Jæja, nenni ekki meir...klukkan orðinn miklu meira en margt.

Bið að heilsa í bili,

Arnar Thor

Ennþá á lífi

2007-06-14T14:49:00.000+02:00

Hæ,

Ég er ennþá hérna. Ekkert að frétta. Farinn að borða hollt inn á milli þess óholla.

Nokkrar myndir að neðan:

Matthías að sleikja sólina.

Dísa Drottning í skólaleikriti. Stóð sig eins og hetja.

Alexander Rokkari.

Matthías á vélnauti. Hékk ótrúlega lengi á bola.

Kveðja,

Arnar Thor

Vinna, fótbolti og þurrir fætur

2007-06-03T10:04:00.000+02:00

Hæ,

Byrjaður að vinna hjá UPS. Lítur bara ágætlega út og útlit fyrir að það verði brjálað að gera og það er bara fínt. Doði er trygg leið í dauðann. Félagar mínir þarna í vinnunni mættu nú alveg taka fram hlaupaskóna og ætla ég að reyna að nota þá sem fína "fyrir-mynd" og vera sjálfur góð "eftir-mynd". So far not so good. Ég hef velt mér full mikið upp úr lystisemdum Maarud, Kims og álíka snakkara....Þarf að hætta því.

Anyway, fyrir þá sem eru enn að velta fyrir sér hvað ég mun vera að gera hjá UPS þá er ég sem sagt "tæknilegur ráðgjafi og sölumaður" á upplýsingatæknilausnum til núverandi og nýjum kúnnum. Þetta tengist svo allt flutningi á pökkum. Ég mun þurfa að versla mér bíl og hefði líklega ekki getað valið dýrara land fyrir þau kaup, en ég fæ nú bílastyrk og skattaafslátt af akstrinum.

Í gær var fótboltagleði og ógleði í Danmörku og Svíþjóð þegar þessar þjóðir mættust í Parken í Köben í gær. Það var ótrúleg eftirvænting og svo byrjaði leikurinn...Danir fengu á sig 3 klaufaleg mörk á fyrstu 25 mín. leiksins, en með frábærum seinni hálfleik náðu þeir að jafna. En, þá gerðist það ótrúlega. Christian Poulsen, Sevilla spilarinn, fékk þá snilldarhugmynd að kýla einn sænskan sóknarmann í magan. Fékk rautt og í kjölfarið hljóp einhver hálfviti inn á völlinn og reyndi að kýla annars fínan dómara leiksins. Þetta varð til þess að dómarahróið í samráði við aðra í tríóinu ásamt fleirum flautaði leikinn af. Ömurlegur endir á annars mjög skemmtilegum fótboltaleik.
ExtraBladet var alveg "brjálað" og birti strax mynd af bjánanum á heimasíðu sinni og bað fólk um að hafa samband ef það þekkti nafnið á manninum. Núna er komið í ljós að þessi gutti býr í Svíþjóð af öllum stöðum.

Ég hlustaði á Rás 2 í gær á lýsinguna á landsleik Íslands og fótboltastórveldisins Lichtenstein. Það verður að segjast eins og er af lýsingunni að dæma að Ísland reið ekki feitum hesti eða bara hesti yfirhöfuð. Máttum þakka fyrir að tapa ekki leiknum fyrir utan kannski örfáar mínútur í lokin. Grátlegt að gera bara jafntefli við stórveldið á heimavelli. Eigum að vinna þá nokkuð auðveldlega, en þetta sýnir bara vel stöðu íslenska landsliðsins í dag. Það eru ekki nema hvað 10 ár síðan Guðjón bakbítur og fórnarlamb kynlífströllsins Ingólfs Hannessonar, réði ríkjum og náði okkur í kringum 50. sætið á heimslistanum...kannski lengra síðan. Fótboltaminni mitt er stundum ekki alveg það besta.

Að lokum vantar mig ráð við þurrum fótum, eða býð fram þjónustu mína við að slípa parkett undir nýju nafni "Berslípað".

kveð í bili og afsakið fótboltasnakkið...þurfti að koma þessu frá mér :)

Arnar Thor

Back in the DDDK!!!

2007-05-27T10:46:00.000+02:00

Hæ,

Jæja, ég hef nú verið svona frekar latur viðað færa til bókar og bloggs upp á síðkastið. Nú er ég endanlega kominn heim eftir rúmlega mánaðar útlegð í Róm og London.

Eins og kom fram í síðasta bloggi þá skrapp ég í einn sólarhring til Danmerkur í atvinnuviðtal hjá UPS í Skandinavíu. Það gekk svona líka svakalega vel að ég verð ráðinn og byrja í lok komandi viku. Ég skal viðurkenna það að ég er í hálfgerðu spennufalli eftir þetta, enda búinn að vera án vinnu þannig séð í næstum 5 mánuði. Ég segi nánar frá UPS þegar það byrjar.

Eftir að ég kom til baka til Rómar þá tóku við einstaklega ljúfir dagar. Fyrst kláraðist þjálfunin fyrir þátttakendurna frá Malí, Tógó, Niger og fleiri vestur Afríkulöndum. Þetta var skemmtilegur hópur en neita því ekki að tölvuólæsið var pirrandi á köflum.
Eftir "útskrift" á hópnum var farið á gott rölt um bæinn með Cagri og Ipek konunni hans. Ég náði loks almennilegum túrista þarna. Ég skoðaði Pantheon, Spænsku þrepin, frönsku kirkjuna á toppi spænsku þrepanna, tískuverslunargötuna í Róm og fleira á þessum eftirmiðdegi. Endaði svo á ís í miðbænum og það verður að segjast eins og er að Ítalarnir gera fantagóðan ís.

Daginn eftir fór ég svo í kosninga og eurovisionvöku hjá Grími, sem vinnur líka hjá FAO og raunar bjó bara rétt hjá mér. Þarna mættum við nokkrir Íslendingar og áttum frekar fínar stundir á meðan stjórnin hélt og féll. Maturinn var ferlega góður og svo hafði ég verslað þessa fínu hnallþóru í ítölsku bakaríi...ég hefði nú viljað hafa eina slíka hjá mér núna.

Dagarnir á eftir voru sallarólegir. Ég náði að fara á ströndina með Björgvini og co og út að borða. Síðasta kvöldið var okkur CountrySTAT guttunum, frekar þunnskipað lið þann daginn, í pizzu og bjór hjá Bossanum honum Kafkas. Fínn endir á annars frábærum mánuði. Áður en ég fór að sofa þá spjallaði ég við leigusalann minn hann Michael og þakkaði fyrir mig. Hann reyndist mér virkilega vel þennan mánuðinn.

LONDON 17-20 maí.

Jæja, það kom svo loks að því að við hittumst hópurinn í London. Ferð sem búið var að bíða eftir í fleiri mánuði og hitti svona þrælvel inn á þennan mánuð sem ég var í Róm. Ég flaug beint frá Róm til London með Ryanair. Lággjaldaflugfélag par excellance. Ég neita því ekki að það virkaði nú ekki traustvekjandi þegar maður rölti inn í vél og fremstu 5 og 7 öftustu sætaraðir áttu að vera tómar í flugtaki og lendingu til að halda jafnvægi. Ég svona hélt að þegar svona græjur væru hannaðar að þetta væri nú kannski eitthvað sem menn pældu í. En ég er nú bara með BA próf í ensku ekki í flugvirkjun eða álíka. Flugið gekk nú annars vel og gaman að fylgjast með miðaldra ítalanum sem sat nálægt mér hvað hann hafði einbeittan vilja til að vera fyrstur út úr vélinni og náði því með glæsibrag, enda búinn að vera í startholunum alla ferðina. Hann hafði komið töskunni sinni haganlega fyrir í aftasta hólfi og vissi greinilega að vélin yrði opnuð í báða enda þegar okkur yrði hleypt út. Aðdáunarvert að fylgjast með guttanum. Leitt fyrir hann að gróðinn var fátæklegur því að allur tími sem vannst hvarf eins og dögg fyrir sólu í vegabréfa og öryggistékkinu á Stanstead...(ekki viss á stafsetningunni). Bretinn er alveg með öryggismálin í lagi og tilheyrandi "opinbera þolinmæði" með.

Jæja í gegnum öryggistékkið komst ég með töskuna mína sem er ríflega 20 ára gömul, þung og leiðinleg og ekki hægt að draga nema að skilja eftir veruleg ummerki á nylonleðrinu. Félagar mínir í ferðinni voru töluvert nær í nútíma og þægindum hvað þetta varðar.

Ég hitti svo Ragga, Mundu, Steina og Guðrúnu í lestinni á leið inn til London og fékk mér minn fyrsta "americano" kaffibolla í heilan mánuð. Við lölluðum svo inn á hótel eftir smá kortaakróbat, sem var nú bara fínt þar sem ég hafði svona frábæra tösku með í för.
Hótelið var fínt. Misþröngt en alveg nóg, amk fyrir mig. Ég þarf ekki meira. Rúmið var einnig alveg þrælfínt, enda búið við rúmhallæri í þó nokkurn tíma.

Við tók svo þrælskemmtileg helgi þar sem hvergi var sparað í mat, drykk og hlátri.

Ég verð að minnast á matinn. Við fórum á þrjá veitingastaði, mexíkanskan, franskan og svo marókóskan. Allt alveg ferlega flottir staðir með fantagóðan mat, ef undanskilið er sniglaforrétturinn á franska staðnum. Alls ekki fullnægjandi þar. En annað var frábært. Þjónarnir út um allt og svo var eldri kona þarna sem sýndi flott töfrabrögð og hefur tryggt það að Steini mun dreyma laufa þrista í mörg ár.
Marókóski staðurinn stóð upp úr fyrir mig. Maturinn var geggjaður. Ég hreinlega át yfir mig þarna og vinir mínir voru farnir að efast um hæfni mína í að stoppa. En já magnaður matur og rauðvínið var einmitt fyrirtak líka.

Jæja læt þessari færslu lokið í bili. Heill mánuður að baki sem fer í upplifunar og reynslubankann. Ég þakka þeim sem gerðu mér þetta fært og svo yndislegu samferðafólki mínu í klúbbnum. Nú tekur "alvaran" og straumur af samliggjandi virkum dögum. Þrátt fyrir að ég hafi verið í vinnu í Róm þá var þetta líka eins og frí.

Ég ætla að halda áfram að njóta helgarinnar með krökkunum mínum. Við erum búin að hugga okkur töluvert og munum halda því áfram á afmælishelgi kristinnar kirkju.
Lifið heil og gleðilega Hvítasunnu.

Arnar Thor

PS: myndir hér http://picasaweb.google.com/arnar.thor

Fleiri Ítalíu fréttir

2007-05-11T09:54:00.000+02:00

Hæ,

Ég er ennþá hérna. Ég skrapp reyndar til Danmerkur á miðvikudag og kom tilbaka til Rómar í gærkvöldi. Náði heilum 26 tímum í Danmörku. Ég þurfti að mæta hjá félögum mínum í atvinnuleysispakkanum...eitthvað tregir þar að leyfa mér að mæta síðar og svo fór ég í atvinnuviðtal í Köben hjá www.ups.com. Þessi ferð lukkaðist nú bara frekar vel og ég vil þakka Heiðu sérstaklega fyrir allt skutlið í gærmorgun og allt það span.

Ég hitti gríslingana mína líka og það var nú ekki leiðinlegt. Ferlega gaman að hitta þau og ég hlakka jafnvel ennþá meira til þegar ég kem tilbaka.

Þessi ferð verður nú líklega til þess að ég græði nú takmarkað á þessu Ítalíudæmi en reynslan og upplifunin er þó það sem ég tek með mér og það er meira en einhver mínus á bankabók. Þannig að ég held að ég hafi gert rétt með að fara hingað og víkka aðeins þennan hring sjóndeildar.

Á morgun er svo stefnan sett á Júróvisjón og Kosningapartí hjá einum íslendingi hérna í bæ sem reyndar vinnur hjá FAO. Ég hlakka til að sjá hvernig það verður, en ætli Júróið verði ekki eitthvað dræmt fyrst að Rauðskalli komst ekki áfram. Ég fer reyndar fram á nafnabreytingu á Júróvisíón og köllum þetta Júró East.

Ég er að hnoða myndum á netið og þær er að finna á eftirfarandi slóð:

http://picasaweb.google.com/arnar.thor

Annars er lítið að frétta...bjór og matur áfram jafngóður og vínið ekki verra.

kveðja,

Arnar Thor

2007-05-04T10:55:00.000+02:00

Föstudagur!!!!

Neglunag og sérhæfð þjónusta.

2007-04-29T18:52:00.000+02:00

Hæ,

Smá lína í dag...ég hef stundum nagað neglur og þetta er nú frekar leiður ávani og bara hreint út sagt vondur siður. Ég hef þó reynt svona að fara fínt með það. Ítalir sem naga neglur eru bara ekkert að fela það. Ég hef séð ansi oft núna síðustu daga Ítali nagandi neglur eins og óðir væru og skammast sín greinilega ekkert fyrir það. Kannski þetta sé eitthvað sem þeir eru stoltir af.

Í gær fór ég í mat til Björgvins og co. Fékk þar alveg ljómandi máltíð. Kræklingar soðnir í hvítvíni með pastalengjum. Hrikalega var þetta gott og hvítvínið var sko ekki sparað í þetta. mmmmmmmmm!!!!! Svo spjölluðum við vel og lengi og ég rölti heim á leið...og kemur þá að hinu efni í titlinum: Sérhæfð þjónusta.

Á heimleiðinni þurfti ég að fara yfir breiðgötu sem kallast Cristofo Columbo...hvorki fleirri né færri en 5 akreinar í hvora átt og maður þarf að vera nokkuð snöggur yfir. Nema hvað við þessa götu standa venjulega stúlkur léttklæddar mjög og veita ákveðna og tja satt að segja sérhæfða þjónustu. Ég rölti þarna í gegn og reyndi að láta ekki glepjast af markaðstali og útstillingum. Merkilegt fyrirbæri. Þarna rétt hjá er smá garður með eitthvað af trjám og mér varð litið inn í skóginn. Þarna sáust skuggamyndir sem satt að segja maður sér ekki á hverjum degi. Þarna voru sem sagt kúnnarnir teymdir og fengu tilheyrandi þjónustu.
Já, maður hefur séð ýmislegt um ævina.

Ég ákvað að herða gönguna og koma mér heim. En sem sagt ef þið eruð á leið til Rómar og vantar svona þjónustu þá get ég sagt ykkur hvar hana er að finna. Mæli þó sjálfur með heimavinnunni ef í harðbakka slær.

Lifið heil og áframhaldandi gleðilegan hvíldardag.

Arnar Thor

Alexander Ágúst er 10 ára í dag!!!

2007-04-22T15:13:00.000+02:00

Hæ,

Elsku Alexander Ágúst er 10 ára í dag. Mér finnst frekar leiðinlegt að vera ekki með honum í dag. Hann var orðinn mjög spenntur áður en ég fór og var byrjaður að plana afmælisveisluna með bekknum sínum frá A til Ö. Skildi þó ekki vera að það leynist í honum skipulagningssnillingur.

Að öðru leyti þá er ég ennþá í Róm og hef það svona þokkalegt. Ég skellti mér í vinnuna í dag, sunnudag, til að koma vel fyrir he he, en hef gert fátt annað en setið og lesið www.mbl.is og hlustað á Silfur Egils. Ég hef þó einsett mér að klára ákveðið verkefni fyrir heimferð í dag.

Róm er alveg dásamleg satt að segja. Ég kíkti á Colosseum síðasta miðvikudag og þetta er nú engin smásmíð. Aðrar byggingar hef ég aðeins kíkt á og það er merkilegt að standa þarna þar sem vagga hins vestræna heims liggur. Hérna drýpur sagan af hverju strái. Að sjá krukkur og minjar sem eru jafnvel meira en 2000 ára gamlar er bara eiginlega ótrúlegt.

Ítölsk matarmenning er skemmtileg. Ég fór út að borða með Björgvini vinnufélaga, konu hans og tveimur vinkonum þeirra sem voru í "húsmæðraorlofi hér um helgina. Við settumst inn á stað sem var með sjávarrétti í hávegum. Ég fékk mér þó nautasteik í það skiptið, en fékk djúpsteiktan saltfisk í forrétt. Svo fékk ég mér góða tiramisu köku á eftir. Hérna er meðlætið pantað sérstaklega. Þegar maður pantar steik eða eitthvað annað þá fær maður bara það og basta!. Meðlæti þarf að panta sérstaklega. Hérna eru engar ríkar sósur, meira svona soð og þess háttar. Þetta er svona frekar léttur matur, mikið um grænmeti og hráefni yfirleitt mjög gott. Það er nú málið hérna að hráefnið er svo gott að það fer nú hálfa leið til að gera matinn góðan.
Þessi veitingastaður var í hverfi sem heitir Trastevere eða "hinu megin við ána" Tevere er áin í gegnum Róm. Ég spurði hvað þeir sem byggju "hinu megin við ána" segðu um þá sem búa "hinu megin við ána" og fékk engin svör :)

Björgvin og co fóru snemma heim og ég ákvað að rölta um svæðið. Mannmergðin var gríðarleg og allir staðir meira og minna fullir. Mikið næturlíf hérna og skemmtilegt. Trastevere er svona frekar fyrir yngra liðið þó það sé góð blanda þarna. Ég tók svo þá örlagaríku ákvörðun að rölta áleiðis heim og snarvilltist í Róm um 2 um nótt. Þegar ég var búinn að sjá sama bílaumboðið í annað sinn þá settist ég inn á bar á Via Marmorata og spjallaði þar við fína bardömu sem heitir Claudia. Hún vísaði mér veginn á meðan ég sötraði á annars fínum ítölskum bjór.

Það góða við þessa villigöngu er að ég sá tvær magnaðar byggingar Tempio Vesta og Piramide di Caio Cestio, reyndar var ég búinn að sjá Piramide áður bregða fyrir, en var núna "up close". Ég fór þó ekki inn í þessar byggingar eðlilega því klukkan var 2 að nóttu. Piramide er eini pýramídinn utan Egyptalands og er bara frekar flottur. Þar fyrir utan er svo fornt borgarhlið sem er flott. Tempio Vesta er svo flott bygging og nánar um hana hér http://en.wikipedia.org/wiki/Temple_of_Hercules_Victor .

Svo í gær fór ég á fínan bar sem heitir Finnegans og þar glápti ég á einn fótboltaleik þar sem Manchester menn voru heppnir að tapa ekki fyrir baráttuglöðum Middlesborough mönnum með hinn léttklikkaða Viduka í fararbroddi. Þarna hitti ég nokkra íra og breta og það var bara mjög gaman. Stereótýpurnar úr bíómyndunum voru þarna ljóslifandi. Ansi fyndið og þurfti ég að sitja á mér nokkrum sinnum.

Jæja, farinn að vinna smá og svo skelli ég mér heim með Metró á eftir.

kveðja og enn og aftur Alexander til lukku með daginn.

Arnar Thor

Róm

2007-04-18T22:45:00.000+02:00

Halló Halló gott fólk.

Ég hef ekki bloggað í smá tíma og það er nú ríkuleg ástæða fyrir því. Síðasta fimmtudag fékk ég símtal frá Björgvini kunningja mínum í Róm og hann færði mér þær gleðifréttir að það vantaði mann til Fao.org í einn mánuð og spurði hvort ég vildi koma og ég var ekki lengi að hugsa mig um. Hins vegar þurfti ég að fara eins fljótt og hægt var, sem ég og gerði og er sem sagt kominn til Rómar. Kom síðasta mánudag og byrja að vinna formlega á morgun.

Það er óhætt að segja að Róm er stórkostleg borg. Ég fór að skoða Collosseum í dag og það er nú engin smásmíð. Maturinn hérna er ekki slæmur og verðlagið er ekkert sérlega slæmt heldur. Ég hlakka til að takast á við málið líka þó ég verði ég bara í einn mánuð. Ég skil ekki baun í þessu máli hérna og Ítalir eru greinilega ekki með ensku sem fyrsta erlenda tungumál í skólum. Ég er þó farinn að geta pantað mér espresso skammlaust og það er nú stórt skref fyrir kaffisjúkling eins og mig. Umferðin hérna er bara fáránleg. Það eru tvær reglur: 1. Ef það er pláss, keyrðu. 2. Ekki keyra á þann fyrir framan þig.
Hérna sjást varla gangbrautarljós og ítalarnir rölta bara út á götuna ef þeim sýnist og furðulegt nokk þeir komast yfir nokkuð skammlaust. Hinir verða ellidauðir á kanntinum.

Á morgun byrjar sem sagt vinnan formlega og það verður fróðlegt. Vinnufélagar mínir eru fínir og koma frá Þýskalandi, Tyrklandi, Ítalíu og svo hann Björgvin sem er nokkurn veginn íslenskur :)

Jæja meira var það ekki í bili. Ég ætla að skila leigusalanum tölvunni hans. Hann lánaði mér tölvuna sína í smástund. Talandi um það þá er ég á fínum stað í flottu herbergi á efstu hæð í 6 hæða blokk með magnað útsýni og flottum svölum. Michael leigusali minn er hálfur þjóðverji og hálfur svíi og hefur reynst mér mjög vel og ég bara gæti ekki verið heppnari held ég.

kveðja í bili frá vöggu hins vestræna,

Arnar Thor

Að ná heilsu

2007-04-07T19:20:00.000+02:00

Já, held að heilsan sé að koma...endanleg upprisa á morgun eða hinn. Hef verið svona í slappara lagi síðustu daga. Mér hefur liðið eins og gólfi í öldruðum leigubíl. En eftir góðan kuldahroll í dag með viðkomu í skjaldamerki kapítalistans held ég að heilsan sé að koma. Þakka föruneyti hrollsins í dag...

Núna er stutt í páska...ég er búinn að versla 3 páskaegg handa gríslingunum. Það verður nú að segjast eins og er að páskaeggjagerð á Íslandi er nokkrum gæðastigum fyrir ofan því hérna í henni Danmörkinni...Íslendingarnir hafa þó vit á að nýta rýmið, en það hefur farið framhjá súkkulaði verkendum hérna úti...reyndar er Kindereggið undantekning og þaðan eru eggin í ár. Páskaeggjaútgáfa Kinderegg varð sem sagt fyrir valinu.

Jæja, best að ná í þvottinn...tók upp á því að þvo aftur...held reyndar að það hafi nú bara verið nokkuð sterkur leikur nú á þessum síðustu og verstu.

kveðja,

Arnar Thor innan við 4 ár í fertugt...úffffff

afmæli

2007-04-06T20:04:00.000+02:00

átti afmæli í gær...rólegur dagur fullur af flensu...annars ekkert að frétta og býst ekki við að blogga mikið á næstunni...kveðja, Arnar Thor

Einföldun

2007-04-01T11:47:00.000+02:00

HÆ og gleðilegan 1. apríl. Ég er í mikilli einföldun þessa dagana...einfalda og skipuleggja þess vegna vil ég benda á að ég nota ekki addi_thor@hotmail.com lengur fyrir MSN heldur arnar.thor@gmail.com Glöggir lesendur sjá að þetta er í raun sama og tölvupóstfangið mitt. Þannig að addi_thor@hotmail.com er ekki lengur til og hefur fylgt mér í ein 10 ár held ég bara svei mér þá.

kveðja,

Arnar Thor Stefánsson
Faaborgvej 4 4.sal
5250 Odense SV

E-Mail: arnar.thor@gmail.com
MSN: arnar.thor@gmail.com
Tel: +45 61684311
Skype ID addi_thor
SkypeIn +45 36965539

Not the happy camper

2007-03-29T20:17:00.000+02:00

Jæja, dagarnir í gær og í dag hafa verið svona frekar daprir, nema þá að ég eyddi miklum tíma með Matthíasi sem var alveg frábært.

Í gær fékk ég svo heiftarlegt vöðvabólgutilfelli með tilheyrandi höfuðverk og ógleði. Ég hélt hreinlega að ég væri að deyja. Mér hefur sjaldan liðið eins illa. Ég fékk íbúfen hjá Mána kunningja mínum hérna nálægt sem sló á það mesta, en það tók mest allan daginn að losna við þetta helv... Í dag hef ég verið ansi aumur í öxlunum og ferlega slappur, en þó laus við ógleðina og hausverk. Ég lét lækni kíkja á mig í dag á sama tíma og ég fór með Matthías út af hans krankleika. Samkvæmt lækninum þá er ég alveg ofurspenntur og fékk bólgueyðandi og ráð. Matthías sem betur fer er ekki með eyrnabólgu eins og við Sólrún óttuðumst og mun líklega ná sér fljótlega. Hann hefur hóstað úr sér öll helstu líffæri að auki síðustu daga. Frekar ljótur hósti, en það á víst að lagast líka samkvæmt lækninum.

Ég fékk svo að vita það að ég kæmi ekki til greina í stöðu hjá Kaupþingi í dag. Ég fór í símaviðtal þar á þriðjudag og satt að segja var nokkuð vongóður eftir það símtal. Satt að segja bara nokkuð bjartsýnn, en alveg eins og íslenska landsliðið þegar það er 8 mörkum yfir þá var þetta of gott til að vera satt. Ég er hálfdapur í dag og finnst mér ég vera síðasti kalkúnninn í borðinu. Hund, hundleiðinlegt ástand. Ég þarf að rífa mig upp aftur eða eins og pabbi sagði "rétta úr kryppunni".
Fólk hefur keppst við að segja mér að þetta komi og ég kann vel að meta það, en satt að segja þá finnst mér ég nú ekki hafa of mikla trú á því þessa dagana. Ég hef fengið eiginlega of mörg "nei" upp á síðkastið. Sjálfsagt margir í verri stöðu en ég, en mér líður samt illa yfir þessu öllu saman.

Þannig að í dag ætla ég að leyfa mér að vorkenna sjálfum mér til hins ýtrasta og jafnvel ítrasta og sleikja sárin.

Lifið heil!

Arnar Thor

bloggedí blogg

2007-03-28T00:09:00.001+02:00

Smá blogg frá annars tíðindalitlum Óðinsvéum.

Atvinnuleit heldur áfram. Var í viðtali í dag og nú er ég að bíða eftir svari frá tveimur stöðum. Eitt hér í Danmörkinni og svo eitt heima á Íslandi. Vonandi skýrist eitthvað fyrir mánaðarmót...ég neita því ekki að mér hundleiðist þetta ástand...

Samt sem áður þá kemur sólin yfirleitt upp á morgnana og ég á ennþá smámynt til að kaupa kaffi...ég þarf ekki mikið.

Hef nákvæmlega ekkert að segja meir í bili...tek glaður á móti "kommentum".

kveðja,Arnar Thor

Arnar Túlkur

2007-03-23T18:38:00.000+01:00

Já, ég var túlkur í dag og það var álíka mikil þörf á mér og kattalúgu í fílahúsi. Ég mætti í réttarsal klukkan 12 í dag og sat sem túlkur fyrir þennan fína karl...by the way einungis 2 árum eldri en ég, mér fannst nú munurinn hljóta að vera meiri og mun fara í ýtarlega nafla, augna og ennisskoðun seinna í kvöld. Alla vegana, viðkomandi hafði verið tekinn fyrir það að keyra of nálægt öðrum bíl á hraðbraut í Danmörkinni. Þetta athæfi mannsins var tekið upp á myndband og það verður nú að segjast eins og er að þetta var nú ansi strangt tekið á málum þegar myndbandið fékk að rúlla í salnum. Jú, hinn ákærði viðurkenndi að hafa keyrt of nálægt og myndbandið sýndi það óyggjandi, en miðað við umferðarþunga og allt það þá var þetta nú hálf aumt að taka manninn fyrir að valda hugsanlegum árekstri, sem svo er matsatriði hvort hann hefði lent í þeim árekstri...japl og jamm um viðbragðsflýti og þess háttar. Alla vegana, ég þurfti ekki að túlka neitt og hinn ákærði var nú ef eitthvað var töluvert betri í dönsku en ég. Hann var svo dæmdur til að greiða sekt, endurtaka ökuprófið og skilorðsbundna ökuleyfissviptingu til 3ja ára. Frekar strangur dómur.

Ég hef amk núna prófað að sitja í réttarsal í Danmörku.

Dagurinn í dag að öðru leyti hefur verið mjög fínn. Núna eru krílin að glápa á Disney show og svo ætlum við að smella einni filmu í tækið og glápa og borða snakk.

Ég bið að heilsa í bili,

Arnar Thor

Mánudagur til mæðu og allt í móðu

2007-03-19T19:52:00.000+01:00

Jamm þá er kominn mánudagur enn og aftur. Ég fer í viðtal á morgun og það verður í Köben enn og aftur. Mér finnst svo sem ágætt að ferðast með lestinni. Þetta er hinn prýðilegasti ferðamáti. Maður situr þarna sallarólegur, nema að einhver eigi sætið pantað, og les í bók eða blað og horfir á landslagið rúllar framhjá. Ferðalagið tekur ca. 1 og hálfan tíma sem er alveg temmilegt.

Dagurinn í dag hefur verið frekar rólegur, sem og gærdagurinn. Það er alveg ljóst að orðatiltækið "if you want something done ask a busy person" er nokkuð rétt eftir mínar empírísku rannsóknir síðustu 2 mánuði.

Annars er fátt að frétta hérna. Veður hefur verið hálfdapurt, haglél, rok og rigning. Suðurnesjafílíngur í veðrinu. Hins vegar er von á betri tíð og vorið kemur venjulega hérna án þess að blekkja mikið eins og maður hefur stundum upplifað á æskuslóðum.

Á föstudag skal ég...haldið ykkur fast...vera túlkur í réttarsal hér í Odense. Ég fékk símhringingu frá einhverju sem kallast Túlkafélag Danmerkur fyrr í mánuðinum og ég var beðinn um að vera túlkur. Ég hafði smellt inn á CVið mitt að ég hafði starfað örlítið sem þýðandi heima á klakanum. Nema hvað að ég var spurður og ég sagði "já takk" og svo verður þetta fróðlegt í réttarsal á hádegi næsta föstudag. Mér leikur grunur á að sá sem ég skal túlka fyrir sé eitthvað betri í dönsku en ég he he ef grunur minn reynist réttur. Annars er stórskrítið að ég sé fenginn þarna inn eftir eitt mjöööög stutt símtal, en vinna er vinna.

Jæja ég segi bless í bili.

Arnar Thor

Sunnudagur

2007-03-18T12:20:00.000+01:00

Hæ,

Sit hérna við tölvuna...enda ekki hægt að blogga öðruvísi. Fór í gær í mat til Ragnhildar og Mána og Demantsvejgengið var líka á staðnum. Við fengum þetta afbragðs kjúklinganachos og var það nú töluvert betra en veitingahúsanachosið hér í bæ.
Ég var nú næstum hættur við að mæta á svæðið. Er búinn að vera hálfkrumpaður og er enn. Ég hef verið svona næstum lasinn með smá hléum í einar 2 vikur. Aldrei náð samt að verða almennilega lasinn. Ég vil þá frekar fá fullan skammt í 2-3 daga og sleppa. Daginn í dag ætla ég að nota þá í að afkrumpa mig ef það er þá hægt. Drekka te og iðka siðsamar athafnir, narta í vítamín og ávexti og horfa á eingöngu heilsubætandi efni í sjónvarpinu, e.g. Vítamín fyrir fátæka og fleiri slíka þætti.

Jæja nóg af bulli komið. Ég ákvað að blogga því ég hef sjaldnast bloggað á sunnudegi. Þakka þeim sem lásu og trúðu samt.

Arnar Thor

Laugardagsblogg

2007-03-17T12:47:00.000+01:00

Jæja, ætli það sé ekki ágætt að blogga smá. Vikan búin að vera svona þolanleg. Fór til Köben í atvinnuviðtal hjá www.acronordic.com og eitthvað virðist ég nú vera að haga mér því að ég er boðaður í viðtal hjá þeim á ný næsta þriðjudag (viðtal númer 3). Ég fór líka í viðtal hjá www.tradimus.dk sem er svona support batterí. Ég og viðmælandi minn vorum sammála um það að ég væri í raun "overqualified" og það er líklega í fyrsta skiptið sem ég fæ slíkan dóm. Anyway, mér leist ekkert á þetta og sagði við hann að ég myndi ekki endast árið, en bauðst til að fylla skarðið á meðan ég væri að leita að vinnu. Hann ætlar að skoða það.

Að öðru leyti hefur vikan einhvern veginn flogið framhjá. Ég var með börnin síðustu helgi og það var ferlega ljúf helgi. Börnin voru í sínum besta gír og bara mjög gaman. Við kíktum í pizzu á demantsvej og svo fórum við til Kerteminde á sunnudeginum. Mjög fallegur bær og það var gaman að sjá og heyra hvað Alexander var ánægður með bæinn. Hann var alveg heillaður af gömlu húsunum.

Í kvöld fer ég í mat hjá vinum mínum hérna í Odense og hlakka bara verulega til. Í dag er svo fimleikasýning þar sem Dísa tekur þátt.

Ég læt þessum fátæklegu skrifum lokið í bili.

kv,

Arnar Thor

4. mars (skrifað 6. mars)

2007-03-06T20:40:00.000+01:00

Góðan dag gott fólk.

Móðir mín hefði orðið 68 ára síðasta sunnudag og ég ákvað af því eða í því tilefni (hvort segir maður?) að elda lambalæri og fékk gríslingana mína í mat. Ég hafði með þessu epli í rjóma og koníaki og brúnaðar kartöflur. Það er alveg ljóst að andi mömmu sveif þarna yfir því þetta var í fyrsta skiptið sem mér tókst að brúna kartöflur eins og á að gera og ég er þess fullviss að móðir mín hafi hjálpað þar. Ég hef reynt að brúna kartöflur af og til í síðustu 15 ár og aldrei almennilega náð því þar til nú. Stemmingin við matarborðið var einstaklega ljúf og við sátum og nutum þess.
Mjög, mjög ljúft.

Ég vil óska Írisi frænku (hans Dodda) til hamingju með daginn einmitt þennan sama dag.

Að öðru þá er það að frétta að ég fer í atvinnuviðtal á morgun. Verður fróðlegt að sjá hvað kemur út úr því.

Við Sólrún fórum í dag í foreldraviðtal vegna Alexanders og fengum að vita það að hann sé að standa sig með prýði og að hann sé orðinn öruggari með sig í bekknum og betur "innvinklaður" en áður. Það var gott að heyra.

Jæja farinn að glápa á mína menn, Liverpool, vonandi klára Börsungana í kvöld.

kveðja,

Arnar Thor

Mars á morgun...kannski ég fái mér nammi

2007-03-01T00:11:00.000+01:00

Hæ á ný!

Ég hef engar fréttir...alls engar fréttir...já guð minn góður ég hef ekkert að segja.

Mánudagurinn var ansi blár og gærdagurinn var á sama litaspjaldi, nema hvað að það var svona skvetta af rauðum lit blandað út í.

Ég eldaði mér þetta fína tortelini og hugsaði með mér að fá mér eins og eitt rauðvínsglas með. Nokkuð fljótlega urðu glösin fleiri og ég varð bara pissfullur. Sat hérna glápandi á kassann og megnið af því var bara með öðru auganu því nefndur rauður litur virtist hafa lamandi áhrif á annað augnlokið. Þriðjudagur not to remember.

Dagurinn í dag hefur verið öllu betri. Hjálpaði vinkonu minni af demantsveginum við að setja saman Power Point kynningu. Ég hélt ég kynni meira á þetta, en við lærðum helling í dag og núna rétt áðan náðist afraksturinn á geisladisk og með lagi og öllu. Ferlega skemmtilegt að taka þátt í þessu. Takk fyrir það.

Atvinnuleitin heldur áfram. Get ekki sagt að Danir séu að bíða í röðum með atvinnutilboðin. Reyndar fer ég í atvinnuviðtal í Köben í næstu viku. Var þar í síðustu viku hjá Mærsk, en eitthvað voru menn ósáttir við mig þar og ég var ekki boðaður í annað viðtal. Jæja, það var svo sem í lagi...enda smáfyrirtæki á ferð.

Marsmánuður að byrja...ég er búinn að vera atvinnulaus í 2 mánuði. Hreinlega ekki staða sem ég mæli með og fjárhagslega er þetta ekki heldur sterkur leikur. En með rísandi sól fer þetta væntanlega batnandi...vonandi.
Samkvæmt áreiðanlegum heimildum þá á ég að fá vinnu 12. apríl...kaffibollinn lýgur ekki.

Að lokum vil ég benda á þessa síðu hreinasta snilld.

kveðja í bili,

Arnar Thor....hey by the way...er að leita að vinnu!!!!!!!!

Vetrarfrí

2007-02-21T00:26:00.000+01:00

Já, nú er vika 8 og þá er vetrarfrí skólabarna hér á Fjóni. Held að það sé vikan á undan fyrir krakka á Jótlandi og Sjálandi, amk á Jótlandi.

Það er það að frétta héðan að það er nákvæmlega ekkert að frétta. Fór reynar í viðtal í gær hjá Mærsk, sem er smá fyrirtæki hérna í Danmörku. Þeir eiga nokkra dalla og svona eiga smá skipasmíðastöð ekki langt frá Odense. Anyway, viðtalið var svona og svona. Ég tók eitthvað persónuleikapróf og svo smá stresspróf. Kom ég ljós að ég hafði persónuleika, svo það var nú fínt. Var fram að því ekkert of viss um það.
Ég fæ svo að vita eftir 2 vikur hvort að ég fái eitthvað áframhald þarna. Nákvæmlega hvert starfið er var nú ekki gefið upp og þann jólapakka fæ ég að opna ef ég er boðaður í annað viðtal. Ráðningaferlið er sem sagt 3 viðtöl. Fyrst þetta sem ég var í og svo ef ég er nógu boðlegur þá fæ ég að koma aftur. Ég satt að segja býst nú ekki við því.

Ítalíu dæmið lætur bíða eftir sér. Félagi minn þarna niðurfrá minntist á þetta fyrst við mig í lok Óktóber og svo fyrir alvöru í desember. Í upphafi var talað um 2 mánuði, en það breyttist svo um miðjan janúar og ef af verður þá verða þetta 6 mánuðir. Staðan er þannig núna að það breyttust umsóknarreglur í sjóði þarna, sem gerir það að verkum að þetta gæti tafist fram á mitt ár og þá mun ég væntanlega draga mig út úr þessu, enda hef ég ekki efni á því að vera atvinnulaus mjög lengi.

Annars höfum við krakkarnir það fínt. Við fengum okkur íslensk kindabjúgu í kvöld og það var fínasti matur, en það er alveg ástæða fyrir því að maður borðar þetta ekki mikið oftar en einu sinni á fjögurra ára fresti. Ég reyni að hitta ekki á sama ár og ólympíleikarnir. Alexander borðaði vel af þessu og var sáttur. Dísa hins vegar neitaði að láta þessa birtingamynd landbúnaðar inn fyrir sínar varir og borðaði að ég held 3 mismunandi ávexti.

Á fimmtudag er stefnan sett á Köben, þar sem m.a. er ætlunin að kíkja á strikið og svo verðum við hjá Ingu Freyju og Palla seinnipartinn og um nóttina og ætlum að njóta þess að vera til.

Jamm, eins og ég sagði nákvæmlega ekkert að frétta. Lifið heil.

Arnar Thor

Andlát.

2007-02-11T00:16:00.000+01:00

Ég frétti það í dag að fyrrum vinnufélagi minn fyrrverandi hlaut hræðileg örlög í vikunni. Hann hét Hlynur Konráðsson og vann hjá Friðriki Skúlasyni fyrstu 2-3 árin sem ég var þar. Hann sá um það sem var kallað "vakandi vörnin" í veiruvarnarforritinu Lykla-Pétur.

Ég kynntist Hlyn þokkalega á þessum 2-3 árum og þótti mikið til hans koma. Hann var greinilega þrælklár og hafði unnið sig upp í tölvugeiranum án þess að ganga hinn hefðbundna menntaveg að ég best veit. Hann hafði um sig töluverða skel og hleypti ekki auðveldlega þar í gegn. Ég held að hann hafi nú oft verið þreyttur á spurningum mínum þar sem ég var að reyna að þjóna kúnnanum með ansi takmarkaðri tækniþekkingu á þeim tíma. En einhvern veginn bjargaðist þetta.

Hlynur hætti hjá Friðriki Skúlasyni nokkuð snögglega og mig minnir að þetta hafi verið í apríl mánuði, amk stuttu fyrir sumarið. Ég man ekki hvaða ár það var, en hlýtur að hafa verið árið 1999 eða 2000.

Ég ætla nú ekki að hafa þetta of langt, en síðast minning mín um Hlyn er bara síðan núna í janúar. Ég sá hann á Ölstofunni þar sem hann sat með vinafólki. Ég nikkaði til hans og hann sagði "Neih, Arnar" með sínu sérstaka Hlynsbrosi út í annað. Ég mun aldrei gleyma þessu, því þetta var það eina og síðasta sem hann sagði við mig. Hann var nokkuð vel við skál og tók í hendina á mér og við vorum nokkuð sáttir við þau endalok.

Seinna um kvöldið sá ég hann svo við Pósthúsið í miðbænum standandi þarna í kuldanum eins og hann væri að bíða eftir einhverju. Ég man það þá að ég fann til með honum því hann var greinilega aðeins of hífaður og hugsaði að vonandi kæmi hann sér heim. Ég var sjálfur á heimleið og tók leigubíl aðeins lengra frá. Og nú er hann dáinn.

Ótrúlegt að Hlynur skuli nú vera fallinn frá og 6 ára sonur hefur misst föður sinn. Þarna fór virkilega fínn piltur, sem kannski ekki alltaf átti gott með samskipti við yfirmenn sína amk ekki hjá Friðriki Skúlasyni, en ég held að hann hafi notið virðingar því hann var vissulega góður á sínu sviði.

Ég vona að Hlynur fái góðan sess þarna í næstu tilvist.

Lífið er fallvalt og þetta ætti að kenna okkur enn einu sinni að njóta lífsins á meðan það er því það er svo ótrúlega dýrmætt. Önnur lexía er einnig hérna og hún er sú átakalegasta: Maður deyr einn.

Guð blessi Hlyn Konráðsson og son hans og aðra þá sem lifa hann.

kveðja,

Arnar Thor

Ótrúlegt en satt

2007-02-09T19:50:00.000+01:00

Ótrúlegt en satt þá er kominn föstudagur á ný. Þessi vika rann í gegn eins og smartís í lófa Jésú eftir tréatvikið. Ég sit hérna algjörlega pakksaddur eftir að hafa snætt rúmlega mánaðarskammt rússneskra sjómanna af pizzu. Eg er alveg sprunginn...rauðvínslöggur í glasi nær þó að lina þjáningarnar eitthvað. Börnin mín sitja hérna rétt hjá mér og glugga á skjáinn. Í kvöld er Disney sjóv eins og flesta aðra föstudaga hér í henni Danmörku. Ef mér skjátlast ekki þá hefur Disney sjóv verið hérna í Rúvinu þeirra dana, DR1, síðan fyrir daga Disney sjálfs...væntanlega heitið Frederik sjov eða Egon sjov...á eftir að fá þetta staðfest

Síðustu vikuna hef ég bara verið hreint út sagt súr og svekktur út í lífið...verið með afbrigðum latur...já meira en venjulega...og hreinlega varla haft mig fram úr rúminu. Ítalíudæmið hefur verið að rokka inn og út. Björgvin félagi minn þarna úti hefur verið í sömu stöðu og ég og bíður eftir svari. Ég er líklega alveg búinn að ganga fram af honum því ég er búinn spyrja manngreyjið á hverjum degi hvort að hann viti eitthvað meira um málið. Jæja, ég er að reyna að spá ekki of mikið í þetta og hugsa þannig að ef þetta kemur þá kemur þetta, annars ekki.
Ég er að öðru leyti að sækja um vinnu hist og her og það hlýtur að koma að því að fólk sjá hvurslags dásemdar manneskja ég er.

Á morgun er laugardagur og þá er "Fastelavnsfest" eða Öskudagshátíð. Hún er haldin þessa helgi þar sem vetrarfrí er eftir næstu helgi. Alexander fer sem Svarthöfði, Matthías verður íklæddur sjóræningjabúningi og Dísa verður kvenútgáfa af sjálfum skrattanum...veit ekki hvað fékk hana til að snú á þá braut.

Jæja, kvöldið búið vera ágætt. Saddur, fínn og glaður atvinnuleysingi kveður í bili.

Arnar Thor

Super Bowl og vaðið úr einu í annað.

2007-02-05T02:40:00.000+01:00

Hæ,

Sit hérna midt om natten og horfi á Super Bowl. Ég held ég hafi séð í kringum 8-10 Super Bowl leikjum síðan 1995...kannski misst af 2-3 leikjum. Ég hef ekki alltaf endst allan leikinn, en núna hefur þetta verið alveg ljómandi skemmtun og alveg þess virði þó ég viti það að ég þarf að vakna klukkan 5:30 og koma börnum á ról og svo kemur Sólrún og skellir þeim á tilheyrandi stofnanir.

En að leiknum. Í kvöld mætast Chicago Bears og Indianapolis Colts. Leikurinn fram að þessu er búinn að vera frábær og svo í leikhléi spilaði enginn annar en Prince sjálfur eða Symbol eða hvað hann kallar sig utan sínu skírnarnafni sem er Prince Roger Nelson. Glöggir lesendur sjá þarna að hann heitir víst Prince. Ég var kátur með að hann tók lög eftir aðra líka og þar á meða Best of you (held að ég muni nafnið rétt) eftir Foo Fighters sem er snilldar lag. Pilturinn tók það lag bara alveg ágætlega og vældi vel inn í. Svo tók hann smá leik með Dylan slagarann "All around the watchtower". Nei, Jimi Hendrix samdi ekki það lag. Komst að því í gær að Dylan heitir í raun Robert Allen. Hafði nú aldrei spáð í því. Dylan nafnið tekur hann frá Welska ljóðskáldinu Dylan Thomas, sem einmitt samdi ljóðið ógleymanlega með línunni "Do not go gentle into that good night".

Aftur að leiknum og vaðið heldur áfram úr einu í annað. Í liðið Indianapolis er piltur sem heitir Peyton Manning, sem er leikstjórnandi þeirra eða 25% til baka (quarterback) og er einn sá besti síðan Joe Montana réði ríkjum þarna í NFL deildinni. Má þó minnast á John Elway sem lukkaðist að vinna Super bowl á gamalsaldri. Anyway, ég er að vona að Manning vinni þennan leik því hann á það svo innilega skilið eftir ótrúleg ár í deildinni. Þess má geta að bróðir Manning er leikstjórnandi hjá New York Giants, Eli Manning.

Staðan akkúrat núna er 22-14 fyrir Indianapolis Colts. Chicago byrjaði betur og komst í 7-0 bara á fyrstu mínutu leiksins, en það lítur núna út fyrir að folarnir taki þennan leik.

Að allt öðru þá fór ég í alveg ágætis afmæli síðasta föstudag þar sem Heiða vinkona og Máni héldu upp á afmælin sín. Reyndar á Máni ekki afmæli alveg strax, en tók forskot á sæluna með henni Heiðu. Afmælið var haldið heima hjá Heiðu og eftir töluverða bjórinntöku sá ég ekki annað í stöðunni en að koma mér heim, þó ekki fyrr en ég hafði skíttapað í Trivial Pursuit. Sumir voru heppnari með spurningar en aðrir.

Helgin hefur svo að öðru leyti farið í það að dunda mér með krökkunum. Á laugardag tókum við gott bæjarrölt og ég endaði á að gefa þeim smá MacDonalds og í staðin sýndu þau mér óendanlega þolinmæði þegar ég skoðaði föt í nokkrum búðum. Takk fyrir það ljúflingarnir mínir. Ég nota alveg þennan X litning sem mér hlotnaðist rétt fyrir fyrstu frumuskiptingu. Mér finnst ólýsanlega gaman í fata og skóbúðum...nóg um það.

Helgin hefur líka farið í miklar pælingar um lífið og tilveruna eins og venjulega. Í þetta sinn hef ég verið að velta fyrir mér hvaða stefnu maður vill hafa í lífinu. Ég held einmitt að það sé hverjum manni hollt að setjast niður og gera sér grein fyrir því hvort maður hafi yfir höfuð markmið í lífinu og ef svo er hver þau markmið eru. Ég er að vinna í mínum markmiðum og held því fyrir mig...segi ykkur kannski frá þeim ef þau nást ;)

Framundan er svo vika sem mun fara í það að kynna mér C# forritunarmálið og er ég þá væntanlega að sverja eið með the Evil empire, Microsoft, en "if you can't beat them, join them" svo að ég ætla að láta vaða. Ég er reyndar byrjaður aðeins og kannski að maður prjóni fram einum "Halló Heim" í þessu umhverfi.

Jæja, korter eftir af leiknum og Birnirnir eru aðeins farnir að klóra í bakkann, aldrei að vita nema að þeir nái að komast inn í leikinn á ný. Bið að heilsa í bili og takk fyrir þolinmæðina ef þið náðuð þetta langt...

Arnar Thor

Grátur í Danaveldi

2007-01-31T14:59:00.000+01:00

Hæ,

Einstaklega súr dagur eftir afskaplega mikil vonbrigið á handboltavelli í Hamborg. Íslendingar lágu núna í því en ekki Danir. Úff, hundfúlt. Höfuðverkurinn sem hrjáði mig í gær magnaðist allverulega þegar leið á kvöldið og var ágætis skjaldamerki vonbrigðalandsins.
En hvað um það þeir stóðu sig stórkostlega piltarnir, þó mann hefði langað að hringja í Alfreð og benda honum á að Keflavík var með ágætis varnarafbrigði gegn einföldu skyttu uppspili hér í denn. En nú er Keflavíkurveldið á handboltasviðinu minningin ein. Ótrúlega súrt að fá á sig 9 mörk frá rétthentum manni hægra megin.

Dönsku blöðin eru frekar leiðinleg í dag, en þeir veita okkar strákum þó fulla virðingu og viðurkenna það fúslega að það var vægast sagt heppni að þeir komast áfram...pínu plástur á sárin...þó ekki nóg.

Annars er dagurinn búinn að vera stórskrítinn...ég las smá í sjálfsævisögu Bob Dylans. Snilldarbók. Og svo er ég bara búinn að hanga á gamla góða mátann. Ætla núna út að skokka í smá tíma og taka svo á sjálfum mér og þeim verkefnum sem ég hef sett mér í dag.

kveðja í bili og áfram Ísland.

Arnar Thor

Gústavsbergblús

2007-01-28T23:56:00.000+01:00

Hæ gott fólk,

Já, ástkær faðir minn verður sjötugur á morgun/í dag, ég er að krota þetta í kringum miðnættið. Hann er núna á skíðum þarna einhvers staðar...vonandi sjáið þið hann. Elsku pabbi til hamingju með daginn og keep on rockin'.

Helgin hefur verið fín að flestu leiti. Fórum í indælis afmæli í dag þar sem orkuboltinn hennar Heiðu var að fagna 2ja ára afmæli. Mjög gaman og bakkelsið fær A+ og ekki frá því að heilun hafi verið þar á meðal því ég er orðinn fínn í mallanum.

Talandi um mallann þá hef ég verið þeirra gæfu aðnjótandi að horfa yfir landareign mína síðustu daga frá hinu merka bergi, Gústavsbergi. Máttur hringvöðvans var ekki meiri en svo að ég varð að leyfa botni að svífa ca. 40 cm fyrir ofan vatn megnið af laugardeginum.

En allt á uppleið og farið að harðna á dalnum ;)

Á morgun er stefnan að þrífa aðeins slottið, skella mér í rækt, senda atvinnuumsóknir og vonandi er nú ekki langt í að ég fái svar frá bjúrókratinu í Róm.

kveðja,

Arnar Thor

Laugardagur 27. janúar 2007

2007-01-27T13:56:00.000+01:00

Góðan dag,

Ef mér skjátlast ekki þá á Hlöðver fyrrum mágur afmæli í dag og verður hálf níræður. Til lukku með daginn Hlöðver. Sorry ég komst ekki í heimsókn þarna um daginn. Hálf aulalegt þar sem ég var nú ekki langt frá.

Við sitjum hérna ég og krakkarnir og bíðum eftir smákökunum sem við hentum í ofninn. Ég er konungur tilbúins eða hálftilbúins bakkelsis. Þessar kökur byrjuðu sína ævi í verksmiðju út í heimi og enda svo væntanlega í skolpkerfi Odense borgar svona þegar fer að líða á helgina. Þó er það einlæg von mín að eitthvað af þeim sitji eftir sem fituforði í skrokknum svo maður hafi eitthvað til að hlaupa upp á síðar meir ;)

Annars er það nú að frétta að ég er bara fjandi einmanna þessa dagana og bíð eftir svari frá Ítalíu...frekar leiðinlegt að bíða svona...maður bara gerir ekki baun og samt er ég í baunalandi. Ég ætla að reyna að búa mér til stundatöflu í næstu viku og reyna að fylgja henni eftir...ræktin klukkan x, hugleiðsla klukkan xx og væntanlega stundatafla endurskoðuð klukkan xy... Þannig að vikan lítur vel út.

Ég er mikið búinn að hugsa um uppeldi þessa dagana. Ég vildi stundum óska að það væri til strokupróf sem sýndi hvort maður væri að gera rétt eða ekki. Beini þessum orðum mínum til Helga vinar míns að finna upp slíkt próf. Væri mjög hentugt fyrir foreldra sem hafa sent barnið í skammakrók eða álíka viðurlög og berjast við að slökkva á samviskubitsbálinu með hálfum líter af ákavíti.

Jæja ætli ég láti þessu ekki lokið í bili...áfram Ísland...vonandi koma Slóvenar ekki úthvíldir í leikinn, því þeir tóku einum frídegi meira en aðrir miðað við frammistöðu þeirra á móti Frökkum.

kveðja,

Arnar Thor

Kominn aftur í marsípan og ævintýralandið Odense

2007-01-26T08:02:00.000+01:00

Hæ,

Ég er ennþá á lífi...ósköp lítið að frétta. Ég hef verið upptekinn af því að hjúkra dóttur minni þessa dagana. Hún hefur verið veik síðan á mánudagskvöld. Hún var orðin hress á miðvikudag og ég leyfði henni að fara í barnaafmæli með stúlkunum í bekknum. Ég hitti kennarann hennar og sagði henni að mér fyndist hún vera nógu hraust, en viti menn Dísa varð svo aftur veik um kvöldið þannig að það var ákveðið að taka enga sénsa með þetta og halda henni heima fram að helgi. Svo ég sit hérna heima hjá Sólrúnu og sötra kaffið mitt og vafra um netið. Börnin koma svo til mín í kvöld og við ætlum að "detta í´ða" með pizzu, popp og bíómynd. Ægileg spenna í gangi. Svo er stefnan á morgun að baka með genginu. Veðrið þessa dagana er ekki að bjóða upp á mikla útiveru.

Ég er annars að bíða eftir svari frá hinu háu herrum í Róm og vænti svars í næstu viku. Það þýðir að maður er ekki lengur í biðstöðu og getur betur planað næsta leik. Ef af verður þá verð ég í 6 mánuði á Ítalíu og ég neita því ekki að ég kvíði því smá út af börnunum. Því er þó ekki að neita að það væri della að sleppa þessu tækifæri.

Að öðru þá eru Danir frekar kátir með að hafa lagt Spánverjana í handboltanum á sama tíma og við sleikjum sárin yfir tapinu gegn Pólverjum í leik þar sem einhvern veginn Ísland hefði átt að vinna, en bara hreinlega klúðruðu því. Ég er svo sem sáttur við liðið. Það er keyrt á sömu 7-8 mönnum og það tekur sinn toll. Kæmi mér ekki á óvart bara þess vegna að liðið vinni ekki fleiri leiki. Breiddin er bara of lítil. Maður verður víst að vera raunsær.

Verslaði mér mp3 spilara á netinu í gær og sparaði nú bara töluvert miðað við hvað ég hefði þurft að borga út í búð. Var að lesa það í dag í blaðinu Computerworld að fjöldi "netsala" (Hampiðjan ekki meðtalin) í Danmörku hefur fjölgað umtalsvert á síðasta ári, enda ótrúlega lítill kostnaður fólginn í því að hefja rekstur í gegnum netið. Aldrei að vita nema að ég fari í gang með smá sölu líka.

kveðja í bili,

Arnar Thor